សមត្ថកិច្ចត្រៀមខ្លួន ក្នុងការ ការពារសន្តិសុខ អំទ្បុងមហាបាតុកម្មលើកទី២
ភ្នំពេញ៖ នៅអំទ្បុងមហាបាតុកម្មអហិង្សាលើកទី២ របស់គណបក្សសង្គ្រោះជាតិ ដែលគ្រោងធ្វើចាប់ពីថ្ងៃទី១៥ ដល់១៧ ខែកញ្ញា នៅទីលានប្រជាធិបតេយ្យ កម្លាំងសមត្ថកិច្ចចម្រុះ បានត្រៀមខ្លួនជាស្រេច ក្នុងការការពារសន្តិសុខ និងសណ្តាប់ធ្នាប់សាធារណៈ ។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងនៅថ្ងៃពុធនេះថា សមត្ថកិច្ចកងរាជអាវុធហត្ថ មានលទ្ធភាពគ្រប់គ្រាន់ ក្នុងការបង្ការមិនឲ្យមានការផ្ទុះហិង្សាណាមួយ ក្នុងអំទ្បុងមហាបាតុកម្មអហិង្សា ដែលបន្តទាមទារឲ្យបង្កើតគណៈកម្មការឯករាជ្យ ដោះស្រាយភាពមិនប្រក្រតីនៃការបោះឆ្នោត។
លោកបន្តថា កងរាជអាវុធហត្ថ បានត្រៀមរថយន្តពន្លត់អគ្គិភ័យ រថយន្តសង្គ្រោះបន្ទាន់ និងឧបករណ៍ទប់ស្កាត់ សម្រាប់គ្រប់កាលៈទេសៈ។ កម្លាំងកងរាជធអាវុធហត្ថ នឹងត្រូវដាក់ពង្រាយនៅតាមទីតាំងសំខាន់ៗ និងទីកន្លែងដែលបាតុករប្រមូលផ្តុំ។
លិខិតជូនដំណឹងគណបក្សសង្គ្រោះជាតិ ចុះថ្ងៃទី១០ ខែកញ្ញា ផ្ញើជូនសាលារាជធានីភ្នំពេញ ឲ្យដឹងថា មហាបាតុកម្មអហិង្សា ចាប់ផ្តើមនៅម៉ោង៧ព្រឹក ពីថ្ងៃទី១៥ រហូតដល់ថ្ងៃទី១៧ ខែកញ្ញា។ កម្មវិធីមហាបាតុកម្ម មានដូចជា ការសម្តែងមតិរបស់បាតុករ ការសម្តែងសិល្បៈ ចម្រៀង និងការបញ្ចាំងខ្សែភាពយន្តឯកសារ ការអង្គុយស្ងៀមស្ងាត់ ព្រមទាំងការស្នាក់នៅ នៅលើទីលានប្រជាធិបតេយ្យ។
គួររំលឹកថា មហាបាតុកម្មរបស់គណបក្សសង្គ្រោះជាតិលើកទីមួយ កាលពីថ្ងៃសៅរ៍ ទី៧ ខែកញ្ញា ដែលដឹកនាំដោយប្រធាន និងអនុប្រធានគណបក្ស លោក សម រង្ស៊ី និងលោក កឹម សុខា មានអ្នកចូលរួមជាង៣ម៉ឺននាក់។ មហាបាតុកម្មនេះ បានប្រព្រឹត្តទៅដោយសន្តិវិធី៕ Cambodia News