ស្ត្រីបឹងកក់ម្នាក់ រងរបួសសៀតផ្កា ពេលតវ៉ាប្រឆាំងកិច្ចព្រមព្រៀងជនភៀសខ្លួន
សារព័ត៌មាន Cambodia News/
ភ្នំពេញ (២៦ កញ្ញា ២០១៤) ៖ ស្ត្រីបឹងកក់ម្នាក់ នៅព្រឹកថ្ងៃសុក្រនេះ សន្លប់ និងរងរបួសត្រង់សៀតផ្កា ក្រោយពីប៉ះទង្គិចជាមួយកម្លាំងសមត្ថកិច្ច នៅម្តុំក្រសួងការបរទេស ខណៈសម្រុកចូលទៅដាក់ញត្តិទៅស្ថានទូតអូស្ត្រាលីប្រឆាំងនឹងកិច្ចព្រមព្រៀងទទួលជនភៀសខ្លួនពីប្រទេសអូស្ត្រាលី។
កម្លាំងសមត្ថកិច្ចរាប់រយនាក់ បានបិទផ្លូវចេញចូលទាំងអស់នៅម្តុំរដ្ឋសភាជាតិ ក្រសួងការបរទេស និងស្ថានទូតអូស្ត្រាលី ដើម្បីរារាំងការតវ៉ារបស់ប្រជាពលរដ្ឋមានជម្លោះដីធ្លី។
ដោយសារការរារាំង អ្នកតវ៉ាប្រមាណ១០០នាក់ បានព្យាយាមសម្រុកចូល រហូតដល់មានការប៉ះទង្គិចគ្នា បណ្តាលឲ្យអ្នកស្រី បូ ឆវី សកម្មជនតំបន់បឹងកក់ សន្លប់ និងមានស្នាមបែកត្រង់សៀតផ្កា ក្រោយមកអ្នកស្រីត្រូវបានបញ្ជូនទៅមន្ទីរពេទ្យភ្លាមៗ។
តាមគម្រោងអ្នករងគ្រោះដីធ្លី និស្សិតបញ្ញវន្ត និងបណ្តាញព្រះសង្ឃឯករាជ្យ តវ៉ានៅមុខស្ថានទូតអូស្ត្រាលី រដ្ឋសភា និងក្រសួងមហាផ្ទៃ ឲ្យបញ្ឈប់ជាបន្ទាន់នូវកិច្ចព្រមព្រៀងបញ្ជូនជនភៀសខ្លួនអូស្រា្តលីមកកម្ពុជា ដោយសំអាងថា កម្ពុជាត្រូវដោះស្រាយជម្លោះដីធ្លីក្នុងប្រទេសជាមុនសិន អ្នកមានជម្លោះដីធី្លទាំងនោះមកពីសហគមន៍បុរីកីឡា អ្នកបឹកកក់ អ្នកឡពាង និងអ្នកភូមិគាស់ក្រឡ។
គួរបញ្ជាក់ផងដែរថា រដ្ឋាភិបាលកម្ពុជា និងអូស្ត្រាលីសម្រេចចុងក្រោយក្នុងការចុះហត្ថលេខាលើអនុស្សរណៈទទួលយកជនភៀសខ្លួនពីប្រទេសអូស្ត្រាលីមកតាំងទីលំនៅក្នុងប្រទេសកម្ពុជា នៅថ្ងៃទី២៦ ខែកញ្ញា ឆ្នាំ២០១៤ វេលាម៉ោង៣រសៀលនៅទីស្តីការក្រសួងមហាផ្ទៃ៕
