ព្រះរាជពិធីដង្ហែ និងតម្កល់ព្រះបរមអដ្ឋិ បានប្រារព្ធធ្វើហើយនៅព្រឹកនេះ
សារព័ត៌មាន Cambodia News/
ភ្នំពេញ (១០ កក្កដា ២០១៤) ៖ ព្រះរាជពិធីដង្ហែ និងតម្កល់ព្រះបរមអដ្ឋិ ព្រះបរមរតនកោដ្ឋ បានរៀបចំបា្ររព្ធធ្វើហើយនៅព្រឹកថ្ងៃទី១០ កក្កដានេះ ដោយមានវត្តមានអញ្ជើញចូលរួមពីសំណាក់មន្ត្រីរាជរដ្ឋាភិបាល និងព្រះបរមរាជវាំង។
សម្រាប់ព្រះរាជពិធីដង្ហែ និងតម្កល់ព្រះបរមអដ្ឋិ ដែលមានរយៈពេល៣ថ្ងៃទីចាប់ពីថ្ងៃទី១០ កក្កដា ដល់ថ្ងៃទី១២ កក្ដដា ត្រូវបានគណៈកម្មាធិការជាតិរៀបចំបុណ្យជាតិ-អន្តរជាតិ បញ្ជាក់ថា សម្រាប់ថ្ងៃទី ១០ ខែកក្កដានេះ គឺជាព្រះរាជពិធីគោរពព្រះវិញ្ញាណក្ខន្ធពិធីបង្សុកូល និងរាប់បាត្រ នៅមុខព្រះបរមរាជវាំង ដោយក្រសួងធម្មការ និងសាសនា ជាអ្នកចាត់ចែងរៀបចំ។
គួរបញ្ជាក់ថា នៅថ្ងៃទី ១១ ខែកក្កដាស្អែកនេះ ជាព្រះរាជពិធីដង្ហែ និងតម្កល់ព្រះបរមអដ្ឋិ ទីតាំងនៅព្រះ ចេតិយនៃបរិវេណព្រះវិហារព្រះកែវមរកត សម្រាប់ប្រារព្ធព្រះរាជពិធីបុណ្យ ទៅតាមព្រះរាជប្បវេណីជាតិ និងពិធីសាសនា។ ក្នុងរយៈពេល ១ ថ្ងៃនៃការតម្កល់ព្រះបរមអដ្ឋិ ព្រឹក ថ្ងៃ យប់ មានកម្មវិធីសាសនា កម្មវិធីគោរពព្រះវិញ្ញាណក្ខន្ធ កម្មវិធីបាញ់កាំជ្រួច និង មានកម្មវិធីបាញ់កាំភ្លើងធំ នៅពេលដង្ហែ និងបញ្ចុះព្រះបរមអដ្ឋិ។
ដោយឡែក នៅថ្ងៃទី១២ កក្កដា វេលាម៉ោង ៦ព្រឹក គឺជាព្រះរាជពិធីបញ្ចុះព្រះបរមអដ្ឋិក្នុងព្រះចេតិយ កម្មវិធីសាសនា និងតាមការសព្វព្រះរាជហឫទ័យរបស់ព្រះករុណាជាអម្ចាស់ជីវិតលើត្បូង និង សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត៕
