ខៀវ កាញារីទ្ធ ៖ អ្នកចង់ទៅលេងនៅបាងកកគួរតែផ្អាកជាបណ្តោះអាសន្នសិន
សារព័ត៌មាន Cambodia News/
ភ្នំពេញ (២១ ឧសភា ២០១៤) ៖ បន្ទាប់ពី កិច្ចប្រជុំ អនុគណៈកម្មការផ្នែកព័ត៌មាននៅក្នុងតំបន់អាស៊ាន ដែលបានធ្វើឡើងនៅសណ្ឋាគារភ្នំពេញ នៅព្រឹកថ្ងៃពុធ ខែឧសភា នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាលកម្ពុជា បានថ្លែងប្រាប់អ្នកសារព័ត៌មាន ថា រដ្ឋាភិបាលកម្ពុជាកំពុងតែតាមដានយ៉ាងយកចិត្តទុកដាក់ចំពោះស្ថានការណ៍ នៅក្នុងប្រទេសថៃ។
លោក ខៀវ កាញារីទ្ធ បានលើកឡើងផងដែរថា អ្នកដែលមានបំណងចង់ទៅលេងនៅក្រុងបាងកក ប្រទេសថៃ គួរតែផ្អាកជាបណ្តោះអាសន្នសិន ដោយរង់ចាំមើលស្ថានភាពប្រទេសជិតខាងមួយនេះធូរស្រាលសិន។
លោក ខៀវ កាញារីទ្ធ បន្តថា ចំពោះស្ថានការណ៍នយោបាយថៃ ដែលកំពុងគ្រប់គ្រងដោយកងកម្លាំងយោធានោះ មិនប៉ះពាល់ដល់ពលករខ្មែរនោះឡើយ ព្រោះពួកគេភាគច្រើនស្ថិតនៅតាមបណ្តាខេត្ត ខណៈការរំជើបរំជួលភាគច្រើនកើតឡើងនៅក្នុងទីក្រុងបាងកក៕
