ឃុំខ្លួនតារាចម្រៀង អូ រស្មីពីបទអូសទាញពេស្យាចារកុមារ
សារព័ត៌មាន Cambodia News /
ភ្នំពេញ(២១ មករា ២០១៤) ៖ កាលពីសៀលថ្ងៃទី២០ ខែមករា សាលាដំបូងរាជធានីភ្នំពេញបានសម្រេចឃុំខ្លួនជាផ្លូវការ តារាចម្រៀង អូ រស្មី ពីបទអូសទាញពេស្យាចារកុមារ និងសញ្ចារកម្មលើអនីតិជន ដោយមានស្ថានទម្ងន់ទោស ។បទល្មើសទាំងនេះ បើយោងតាមច្បាប់ អាចផ្ដន្ទាទោសឱ្យជាប់ពន្ធនាគារពី៧ឆ្នាំទៅ១៥ឆ្នាំ។
ជនសង្ស័យឈ្មោះ អូ រស្មី អាយុ៣៦ឆ្នាំ ស្នាក់នៅផ្ទះលេខ៨៦ ផ្លូវលេខ២ ក្នុងបុរីពិភពថ្មី សង្កាត់ចោមចៅ ខណ្ឌពោធិ៍សែនជ័យ ត្រូវសមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីឃាត់ខ្លួនកាលពីរសៀលថ្ងៃទី១៨ មករា ដោយយោងលើពាក្យបណ្តឹងរបស់អាណាព្យាបាលជនរងគ្រោះថា នាងបានល្បួងក្មេងស្រីអាយុ១៤ឆ្នាំ ទៅឲ្យរួមភេទជាមួយអាណិកជន។
ក្មេងស្រីជនរងគ្រោះ បានរៀបរាប់នៅចំពោះមុខសមត្ថកិច្ច ថា នាងបានស្គាល់អ្នកចម្រៀង ឈ្មោះអូ រស្មី ប្រហែល២ខែ មកហើយ ហើយពេលជួបលើកចុងក្រោយ រូបនាងតែងតែ ប្រាប់តារាចម្រៀង អូ រស្មី ថា ខ្លួនចង់ក្លាយ ជាតារា ចម្រៀងល្បីដូចរូបគាត់ ។លុះក្រោយមកឈ្មោះ អូ រស្មី បានប្រាប់នាងឲ្យទៅរួមភេទជាមួយនឹងអាណិកជនម្នាក់ ហើយគាត់នឹងជួយឲ្យខ្លួនក្លាយជាតារាចម្រៀងដ៏ល្បី។ ដូច្នេះខ្លួនក៏ យល់ព្រមរួមភេទជាមួយអាណិកជនរូបនោះនៅនៅលើឡៅតឿផ្ទះ របស់ឈ្មោះអូ រស្មី រយៈពេល២ថ្ងៃ។
ដោយយោងលើចម្លើយការឆ្លើយបំភ្លឺរបស់ក្មេងស្រីរងគ្រោះ ទើប តុលាការ សម្រេចធ្វើការ ចោទប្រកាន់និង បញ្ជាឱ្យឃុំខ្លួនអ្នកចម្រៀងឈ្មោអូ រស្មីនេះ តែម្ដងទៅ ៕
