បាតុករក្នុងប្រទេសថៃត្រៀមបិទផ្លូវនៅទីក្រុងបាកកនៅសប្តាហ៍ក្រោយ
បាតុករប្រឆាំងរដ្ឋាភិបាលរាប់ពាន់នាក់ នៅប្រទេសថៃបានដង្ហែក្បួនតាមបណ្តាដងផ្លូវក្នុងទីក្រុងបាងកក ក្នុងខណៈពេលដែលពួកគេកំពុងត្រៀមរៀបចំការប៉ុនប៉ងបិទរាជ ធានីនេះ។
បាតុករនិយាយថា នៅសប្តាហ៍ក្រោយពួកគេនឹងធ្វើឲ្យទីក្រុងបាងកកឈប់ដំណើរការ ដោយការធ្វើបាតុកម្មនៅតាមផ្លូវប្រសព្វសំខាន់ៗ ដែលការធ្វើដូច្នេះ គឺជាផ្នែកមួយនៃយុទ្ធនាការបណ្តេញរដ្ឋាភិបាលដឹកនាំដោយ លោកស្រី យីងឡាក់ ស្ហ៊ីណាវ៉ាត្រ។
ហ្វូងបាតុករ ដែលចោទលោកស្រី យីងឡាក់ ថាជាឈ្នាន់របស់លោក ថាក់ស៊ីន ស្ហ៊ីណាវ៉ាត្រ (អតីតនាយករដ្ឋមន្ត្រីថៃ និងជាបងប្រុសរបស់លោកស្រីយីងឡាក់កំពុងនិរទេសខ្លួនទៅក្រៅ ប្រទេស) មានបំណងបញ្ឈប់ការបោះឆ្នោត ដែលគេគ្រោងនឹងរៀបចំធ្វើទៅនៅខែកុម្ភៈឆ្នាំ២០១៤នេះ។
បាតុករ ទាំងនោះចង់ឲ្យមានការតែងតាំង ក្រុមប្រឹក្សាមហាជន ដើម្បីត្រួតពិនិត្យកំណែទម្រង់នយោបាយ មុនពេលមានការបោះឆ្នោតនៅថ្ងៃអនាគត។
បាតុកម្មជាបន្តបន្ទាប់ នៅប្រទេសថៃ ដែលកើតមានឡើងតាំងពីខែវិច្ឆិកា ឆ្នាំ២០១៣ គឺជាបាតុកម្មដ៏ធំបំផុតក្នុងប្រទេសថៃ បើរាប់ពីឆ្នាំ២០១០ ដែលពេលនោះ បាតុករគាំទ្រ លោកថាក់ស៊ីន បានព្យាយាមធ្វើបាតុកម្មទម្លាក់រដ្ឋាភិបាលជំនាន់នោះដឹកនាំដោយ គណបក្សប្រជាធិបតេយ្យ៕ (Radio Australia)
