មហាបាតុកម្ម លើកទី៣ របស់គណបក្ស សង្រ្គោះជាតិ ចាប់ផ្តើមហើយ នៅព្រឹកនេះ
ភ្នំពេញ៖ ព្រឹកថ្ងៃពុធ ទី២៣ ខែតុលា នេះ មហាបាតុកម្មលើកទី៣ រយៈពេល៣ថ្ងៃ របស់កណបក្សសង្រ្គោះជាតិ បានចាប់ផ្តើមដំណើរការទៅតាមការ គ្រោងទុក និងគិតគូររៀបចំរបស់ពួកគេនៅ លើទីលានប្រជាធិបតេយ្យ ក្នុងសង្កាត់វត្តភ្នំ ខណ្ឌដូនពេញ ជិតស្ថានទូតអា ម៉េរិកដោយមានអ្នកចូលរួមភាគច្រើន បំផុតមកពីបណ្តាខេត្ត។
បើតាមការឲ្យដឹងពីមន្រ្តីគណបក្សសង្រ្គោះជាតិ បានឲ្យដឹងថា មហាបាតុកម្មនេះ ក្រៅពីការជួបជុំសម្តែងមតិលើទីលានប្រជាធិបតេយ្យហើយនោះ ក៏មានដង្ហែងក្បួនយកញត្តិទៅដាក់តាមបណ្តាស្ថានទូត និងការិយាល័យឧត្តមស្នងការអង្គការសហប្រជាជាតិផងដែរ។
លោក ហូ វណ្ណ មន្រ្តីជាន់ខ្ពស់គណបក្សសង្រ្គោះជាតិ បានឲ្យដឹងថា នៅថ្ងៃទី២៣ ខែតុលានេះ ក្រៅពីការជួបជុំនៅទីលានប្រជាធិបតេយ្យ នៅវេលាម៉ោង៣ រសៀល មានការដង្ហែក្បួនចេញពីទីលានប្រជាធិបតេយ្យ ហើយនៅម៉ោង៤ និង៣០នាទី ក្បួននឹងទៅ ដល់អង្គការសហប្រជាជាតិ (ការិយាល័យឧត្តមស្នងការសហ ប្រជាជាតិទទួលបន្ទុកសិទ្ធិមនុស្សប្រចាំកម្ពុជា) ដើម្បីដាក់ ញត្តិ។
នៅថ្ងៃទី២៤ ខែតុលា នៅម៉ោង៨ព្រឹក ក្បួនដង្ហែចេញពីទីលានប្រជាធិបតេយ្យឆ្ពោះទៅស្ថានទូតបារាំង ស្ថានទូតអង់ គ្លេស និងស្ថានទូតសហរដ្ឋអាមេរិក ដើម្បីដាក់ញត្តិ។
នៅថ្ងៃទី២៥ ខែតុលា វេលាម៉ោង៨ ព្រឹក ក្បូនដង្ហែរចេញពីទីលានប្រជាធិបតេយ្យទៅកាន់ស្ថានទូតអូស្រ្តាលី ស្ថានទូត រុស្ស៊ី ស្ថានទូតជប៉ុន ស្ថានទូតឥណ្ឌូនេស៊ី និងស្ថានទូតចិន ដើម្បីដាក់ញត្តិរបស់ខ្លួនផងដែរ។
បើតាម លោក ហូ វណ្ណ បានបញ្ជាក់ថា ការដង្ហែក្បួននេះ អ្នកចូលរួម ៥ពាន់នាក់ ដោយឡែកការដាក់ញត្តិ នៅតាមស្ថាន ទូតនានាវិញនឹងធ្វើការរង់ចាំយ៉ាងយូរយៈពេល ១ម៉ោង ហើយនិងចាកចេញទៅវិញ ប្រសិនស្ថានទូតខ្លះ មិនព្រមទទួល យកញត្តិ។
មហាបាតុកម្ម ដែលគណបក្សសង្រ្គោះជាតិអះអាងជាមហាបាតុកម្មអហិង្សា និងមានទ្រង់ទ្រាយធំខុសពីលើកទី១ និង ទី២នេះ ត្រូវបានគណបក្សសង្រ្គោះជាតិពណ៌នាថា ដើម្បីទាមទារស្វែងរកយុត្ដិធម៌ជូនប្រជាពលរដ្ឋ ជាម្ចាស់ឆ្នោតពាក់ ព័ន្ធ ភាពមិនប្រក្រតី នៃការបោះឆ្នោតជ្រើស រើសតំណាងរាស្ដ្រ នីតិកាលទី៥
ទោះបីជាយ៉ាងណា គណបក្សសង្គ្រោះជាតិ បានបញ្ជាក់ជំហរជាថ្មីទៀតថា ការធ្វើមហាបាតុកម្មនៅ ថ្ងៃទី២៣-២៥ ខែ តុលា ឆ្នាំ ២០១៣ ប្រព្រឹត្ដទៅដោយសន្ដិវិធី និងអហិង្សា និងអំពាវនាវដល់បងប្អូនប្រជាពលរដ្ឋ ដែលចូលរួមធ្វើមហា បាតុកម្មទាំងអស់ ត្រូវរក្សាឱ្យបានខ្ជាប់ខ្ជួន នូវក្រមសីលធម៌ដើម្បី ធានាដល់ដំណើរការ មហាបាតុកម្មឱ្យប្រកបដោយ សន្ដិវិធី និងគ្មានអំពើហិង្សា»៕ Cambodia News
