សហគ្រាសរដ្ឋវៀតណាម Vinashin បណ្តេញបុគ្គលិកការងារ ១៤០០០នាក់
សហគ្រាសរដ្ឋវៀតណាមដ៏ល្បីឈ្មោះ Vinashin បានប្រកាសបណ្តេញបុគ្គលិកការងារខ្លួនចំនួន១៤០០០នាក់ ដើម្បីរៀបចំរចនាសម្ព័ន្ធសហគ្រាសឡើងវិញ។ សហគ្រាសមានបំណងបន្ថយកម្លាំងការងារ៧០ភាគរយ។ នេះបើយោងតាមព័ត៌មានកាសែតបារាំង AFP ចុះផ្សាយនៅថ្ងៃព្រហស្បតិ៍នេះ។ ការប្រកាសបន្ថយបុគ្គលិកក្នុងអត្រាដ៏ខ្ពស់បែបនេះ បង្ហាញពីការខិតជិតទៅរកភាពក្ស័យធននៃសហគ្រាសរដ្ឋដ៏ល្បីឈ្មោះ Vinashin ធ្វើអោយមុខមាត់ហិរញ្ញវត្ថុវៀតណាមបាក់មុខខ្លាំង។
សហគ្រាស ផលិតនាវារដ្ឋវៀតណាម វីណាស្ហ៊ីន ធ្លាប់ស្ទើរតែក្ស័យធនម្តងរួចមកហើយ កាលពីឆ្នាំ២០១០ ដោយកាលណោះសហគ្រាសនេះមានបំណុលរហូតដល់ទៅជាង៤ពាន់លានដុល្លារឯណោះ។ បច្ចុប្បន្ន សហគ្រាសមានបុគ្គលិកការងារ២៦០០០នាក់ បើប្រៀបធៀបទៅឆ្នាំ២០០៨ បុគ្គលិកការងារកាលណោះ មានរហូតដល់៦ម៉ឺននាក់ គឺច្រើនជាងនេះឆ្ងាយណាស់។
នៅពេលនេះ ក្នុងក្របខណ្ឌនៃការរៀបចំកែប្រែរចនាសម្ព័ន្ធរបស់ខ្លួនឡើងវិញ សហគ្រាសវីណាស្ហ៊ីនបានប្រកាសលុបចោលការងារចំនួន១ម៉ឺន៨ពាន់ និងបណ្តេញបុគ្គលិកចេញ១ម៉ឺន៤ពាន់នាក់។ សហគ្រាសមិនបានប្រាប់ពីបញ្ហាលំអិតថា តើត្រូវបន្តផ្តោតការងារលើការផលិតកប៉ាល់ទៀត រឺក៏ត្រូវពង្រឹងការដ្ឋានការងារ។
មុននឹងដាំក្បាលចុះនេះ សហគ្រាសវីណាស្ហ៊ីន បានត្រូវគេចាត់ទុកថា ជាពន្លកផ្កានៃឧស្សាហកម្មវៀត ណាម។ រឿងអាស្រូវថ្មីនេះបានធ្វើអោយរដ្ឋាភិបាល និងផ្នែកហិរញ្ញវត្ថុវៀតណាមបាក់មុខខ្លាំង។ កន្លងមក ទីភ្នាក់ងារវាយតំលៃហានិភ័យ ធ្លាប់បានបន្ថយពិន្ទុសហគ្រាសមួយនេះ ជាច្រើនលើកមកហើយ ដោយចាត់ទុកសហគ្រាសថាមានលក្ខណៈប្រថុយប្រថានចំពោះវិស័យធនាគារ ហើយថា សហគ្រាសបានឆ្លុះបញ្ចាំងពីភាពទន់ខ្សោយផ្នែកផលិត។ កន្លងមក អ្នកទទួលខុសត្រូវសហគ្រាសវីណាស្ហ៊ីន ជាង១០នាក់ហើយ ដែលបានទទួលទោសជាប់ពន្ធនាគារធ្ងន់ធ្ងរ៕ដោយ ព្រំ សឿន សូលីណា(RFI)
