មន្ត្រីបក្សសង្គ្រោះជាតិ និងបក្សប្រជាជនបន្តជួបពិភាក្សាគ្នា
ភ្នំពេញ ៖ មន្ត្រីជាន់ខ្ពស់របស់ គណបក្សប្រជាជនកម្ពុជានិងគណបក្សសង្គ្រោះជាតិ នឹងបន្តជួបពិភាក្សាគ្នា លើបញ្ហាបង្កើតគណៈកម្មការឯករាជ្យ ដើម្បីពិនិត្យពីភាពមិនប្រក្រតីជុំវិញការរាប់សន្លឹកឆ្នោត និងការបោះឆ្នោតជ្រើសតាំងតំណាងរាស្ត្រអាណត្តិទី៥ កាលពីថ្ងៃទី២៨ ខែកក្កដា។
លោក សុន ឆ័យ ជាតំណាងក្រុមការងារគណបក្សសង្គ្រោះជាតិ មានប្រសាសន៍ថា នៅវេលាម៉ោង ២រសៀល ថ្ងៃទី២០ ខែសីហា នេះ នៅឯមន្ទីររដ្ឋសភា ក្រុមការងារ របស់គណបក្សសង្គ្រោះជាតិ និងគណបក្សប្រជាជនកម្ពុជា នឹងបន្តជួបពិភាក្សាគ្នាជុំវិញភាពមិនប្រក្រតី និងការខ្វែងគំនិតគ្នា ទាក់ទងនឹងលទ្ធផលបោះឆ្នោត និងបញ្ហាផ្សេងៗ ដែលកើតមាននៅថ្ងៃបោះឆ្នោត ប៉ុន្តែមិនដឹងថាមានលទ្ធផលបែបណានោះទេ។
ទាក់ទិននឹងបញ្ហានេះដែរ លោក ជាម យៀប ជាប្រធានក្រុមការងារគណបក្សប្រជាជនកម្ពុជា មានប្រសាសន៍ថា កន្លងមកកិច្ចប្រជុំ លើសំណើបង្កើតគណៈកម្មការឯករាជ្យ ដើម្បីស៊ើបអង្កេតពីភាពមិនប្រក្រតីផ្សេងៗ នៃការបោះឆ្នោតសភា អាណត្តិទី៥ មានការខ្វែងគំនិតគ្នា ដោយសារតែបក្សប្រឆាំងមិនចាត់ទុកមន្ត្រីគណៈកម្មាធិការជាតិរៀប ចំការបោះឆ្នោត ឬ គ.ជ.ប ជាអាជ្ញាកណ្តាលនោះទេ។ ប៉ុន្តែលោកថា គណបក្សប្រជាជនកម្ពុជា ក៏មិនអាចបន្តជួបពិភាក្សាគ្នា ជាមួយគណបក្សប្រឆាំងទៀតទេ បើបក្សប្រឆាំងមិនទទួលយកមន្ត្រី គ.ជ.ប ឲ្យធ្វើជាអាជ្ញាកណ្តាលនោះ។
យ៉ាងណាដ៏ដោយ មន្ត្រីគណបក្សទាំងពីរ មិនទាន់បញ្ជាក់ថា លទ្ធផលនៃកិច្ចប្រជុំ រវាងបក្សសង្គ្រោះជាតិ និងគណបក្សប្រជាជនកម្ពុជា ទទួលបានលទ្ធផលបែបណាទេ ក្នុងជំនួបនៅរសៀលថ្ងៃអង្គារនេះ៕ Cambodia News
