សូដា នីតាត្រៀមដឹកដៃអេន ឌីទៅសម្តែងនៅអាមេរិក
ភ្នំពេញ៖ កញ្ញាសូដា នីតាតាំងពីវិលមកស្រូបយកការងារក្នុងអាជីពសិល្បៈវិញមកគឺសង្កេតឃើញថាតារាស្រស់ស្អាតសម្បូរស្នេហ៍ម្នាក់នេះមានការគាំទ្រពេញទំហឹងលើសពីការរំពឹងទុកព្រោះក្រៅពីមានមុខងារជាពិធីការិនីនាងបានបន្ថែមអាជីពជាតារាបង្ហាញម៉ូដមួយទៀតផង។
ថ្មីៗនេះសូដា នីតាដែលកំពុងមមាញឹកក្នុងសិល្បៈមានតម្រុយថាជិតចេញទៅសម្តែងនៅអាមេរិកនាពេលខាងមុខនេះដោយដំណើរចេញទៅក្រៅស្រុកលើកនេះគេដឹងថាលោកអេន ឌីដែលប្រឡូកសិល្បៈរាប់ឆ្នាំមកហើយនោះទើបតែមានសំណាងចេញទៅក្រៅសម្តែងជាលើកទី១ជាមួយនាងដែរ។
កញ្ញាសូដា នីតាបន្ទាប់ពីងាកចាប់ការងារសិល្បៈវិញមកនាងមានកម្មវិធីប្រចាំខ្លួនបន្តពីមួយទៅមួយហើយអាជីពពិធីការិនីដែលនាងធ្លាប់កាន់កាប់នៅប៉ុស្តី៍បាយ័នកន្លងទៅគេឃើញនាងច្បាមយកគ្រប់ប៉ុស្តី៍ដោយមិនមានកុងត្រាចងជើងឡើយពោលនាងទទួលធ្វើដោយឯករាជ្យតែឯង។អ៊ីចឹងហើយទើបសន្ទុះគេឈ្មោះរបស់នាងដែលបានបាត់មុខជាងមួយឆ្នាំកាលពីមុនបានងើបត្រដែតមកវិញហើយបានពង្រីកវិថីនេះបន្តទៀតដោយបង្កើតតួនាទីជាតារាភាពយន្ត តារាម៉ូដែលនិងជាអ្នកចម្រៀងបើគិតមើលទៅជ្រុងសិល្បៈនាពេលនេះសូដា នីតាបានស្រូបយកស្ទើរតែទាំងអស់ទៅហើយ។
ស្របពេលដែលនាងមានព័ត៌មានផ្ទុះជម្លោះជាមួយប្រុសស្នេហ៍សូដានីតានៅតែពង្រឹងគោលជំហរមិនអើពើនិងភាពវាយប្រហារផ្លូវចិត្តនោះឲ្យមកផ្តាច់ចង្វាក់ការងារសិល្បៈដែលកំពុងតែកាក់កបសព្វថ្ងៃឡើយ។ នាងបានបន្តចេញមុខទទួលការងារសម្តែងស្ទើរតែលើសមុនព្រោះក្រៅពីដើរម៉ូដ ច្រៀង និងពិធីការិនីនាងទើបតែទទួលកុងត្រាថតរឿងថ្មីនៅប៉ុស្តី៍លេខ៥ក្រោយចំនងជើងថា«ម៉ឺនុយធ្នាក់អន្ទាក់ស្នេហ៍»របស់ផលិតកម្មមហាហង្សដោយគ្រោងចាក់ផ្សាយនាពេលខាងមុខ។
ឆ្លើយឆ្លងជាមួយអ្នកយកព័ត៌មានយើងក្នុងពេលប្រកាសថតរឿងថ្មីនេះកាលពីពេលកន្លងទៅសូដា នីតាបានប្រាប់ពីការងារសិល្បៈនិងជីវិតផ្ទាល់ខ្លួនថាមកទល់ពេលនេះនាងមិនចង់បកស្រាយអីនិងជីវិតស្នេហាឲ្យគេឯងដឹងថាដំណើរការដល់បែបណាទេ។នាងសុំសិទ្ឋិលាក់ទុកខ្លះព្រោះយល់ថាយើងធ្លាប់ខកបំណងរឿងនេះកន្លងមកដែរអ៊ីចឹងហើយបើសួរនាំបញ្ហានេះនាងដូចជាខ្ជិលនិយាយ។តារាសាច់សរាងខ្ពស់រូបនេះបន្តថាឥឡូវនេះនាងកំពុងតែសម្រុកថតរឿងដែលមានទាំងប៉ុន្មានឲ្យចប់តាមតែការខិតខំបើលឿនមុនកំនត់រិតតែល្អហើយបូករួមទាំងការងារមួយចំនួននៅក្នុងស្រុកទៀតដូចជាដើរម៉ូដពិធីការិនីអីជាដើមព្រោះនៅសល់ពេលតែប៉ុន្មានខែទៀតទេដែលនាងត្រូវចាកចេញទៅសម្តែងនៅអាមេរិករយៈពេលដល់ទៅ៣ខែដោយគ្រោងចេញទៅសម្តែងជាមួយលោកអេន ឌីទៀតផង។
មូលហេតុនេះហើយដែលនាងមិនចង់យករឿងផ្ទាល់ខ្លួនមកគិតជាងរឿងដាក់ចិត្តដាក់កាយគិតលើមុខរបររកស៊ីនិងរិះរកវិធីយ៉ាងណាឲ្យការងារសិល្បៈរិតតែបោះជំហានទៅមុខ។ដំណើរចាកចេញទៅអាមេរិកលើកនេះជាសញ្ញាណមួយកាន់តែបញ្ជាក់ថានាងនៅតែមានអ្នកគាំទ្រទាំងក្នុងនិងក្រៅស្រុកដែលជាទឹកចិត្តមួយជួយឲ្យនាងពេញចិត្តនិងកក់ក្តៅលើអ្វីដែលយើងបានព្យាយាម។ចំនែកការចេញសម្តែងក្រៅប្រទេសនាងធ្លាប់បានចេញទៅកាណាដា បារាំង អូស្តា្រលីនិងកំពុងតែត្រៀមទៅអាមេរិកនាពេលខាងមុខនៅអំឡុងខែវិច្ឆិកាហើយបណ្តាប្រទេសខ្លះនាងទៅសម្តែងញឹកញាប់ជាងគេក៍មាន។
សូដានីតាបានសង្កត់ធ្ងន់ទៀតថានាងនៅតែមានគម្រោងរៀបពិធីចែករំលែកបែបការងារមនុស្សធម៌តាមរយៈមូនិធិសូដា នីតាហើយរាល់ថ្ងៃនេះនាងបានដាក់កម្រិតថាបើសម្តែងម្តងកាត់ទឹកប្រាក់១០%ចូលទៅមូនិធិរបស់នាងទុកចែកជូនជនក្រីក្រហើយមួយរយៈនេះនាងនៅតែបន្តសកម្មភាពដដែលទេដោយមិនបានបង្ហោះតាមហ្វេសប៊ុកដូចមុនទេដើម្បីបញ្ជៀសរឿងគេគិតថានាងធ្វើនេះទាញយកការចាប់អារម្មណ៍ឬបានប្រជាប្រិយភាពអីនោះទើបគេស្មានថានាងលែងមានគម្រោងនេះហើយតែការពិតនៅដដែលទេ៕ ស.រ/Cambodia News
