ពេជ្រ អាវីហ្សា បដិសេធទៅពង្រីកដើមទ្រូងនៅថៃ
សារព័ត៌មាន Cambodia News/
ភ្នំពេញ( ០៤ កញ្ញា ២០១៤) ៖ នៅពេល ពេជ្រ អាវីហ្សា ឈានជើងចូលដល់ពិធីខួបកំណើតរបស់តារាសម្តែងច្រៀង បញ្ញា សិទ្ធ ភ្លាម ទាំងអ្នកសិល្បៈដូចគ្នា និងមហាជនមួយចំនួនបានលាន់មាត់ថា «អីយ៉ា ម៉េចក៏ធំម្ល៉េះ!»។ សម្តីលាន់មាត់គួរឲ្យភ្ញាក់ផ្អើលនេះបានផ្ទុះឡើងនៅពេលដែលតារាស្រីសម្តីស្រទន់មានមន្តស្នេហ៍នាង ពេជ្រ អាវីហ្សា បានរំលេចវត្តមានមកជាមួយនឹងឈុតរ៉ូបសលើក្រហមក្រោមគួរឲ្យទាក់ទាញ ជាមួយការបញ្ចេញសម្រស់ដើមទ្រូងសខ្ចីធំពើងណែនគួរឲ្យក្នក់ក្នាញ់។
នៅពេលម្នាក់ៗលាន់មាត់ស្ទើរគ្រប់គ្នានេះ ពួកគេក៏បានលើកយករឿងនេះមកនិយាយ និងជជីកសួរថា ហេតុអ្វីបានជាតារារូបនេះមានដើមទ្រូងធំសិចស៊ីម្ល៉េះ? តើនោះជាដើមទ្រូងពីធម្មជាតិ ឬក៏កែច្នៃ ខណៈមុននេះគេល្បីថា នាងមានគម្រោងចង់ទៅកែសម្ផស្សឲ្យកាន់តែត្រូវប៉ាន់បន្ថែមទៀតនៅប្រទេសថៃនោះ។
គេសង្កេតឃើញថា ការកែសម្ផស្សនៅក្នុងសង្គមសិល្បៈនាពេលបច្ចុប្បន្នកាន់តែមានសន្ទុះខ្លាំងឡើងៗ ដែលអ្នកខ្លះកែទម្រង់មុខដូចជាការធ្វើច្រមុះ បបូរមាត់ ធ្វើចង្កា និងសាក់ចិញ្ចើមជាដើម។ រីឯអ្នកខ្លះទៀត បានចាយប្រាក់កែច្នៃដើមទ្រូងឲ្យកាន់តែធំឡើងដើម្បីទាក់ទាញការចាប់អារម្មណ៍ ចំណែកឯអ្នកខ្លះទៀតហ៊ានកែខៃត្រគាកទៀតផង។
តែចំពោះការលើកឡើងរបស់មហាជនពាក់ព័ន្ធនឹងការជះប្រាក់កែខៃសម្រស់ដើមទ្រូងឲ្យពើងធំណែនគួរជាទីគយគន់របស់អ្នកផងនេះ ត្រូវបានតារាសម្តែងដែលឆ្វាក់សម្តែងឲ្យផលិតកម្មរស្មីហង្សមាសនាង ពេជ្រ អាវីហ្សា គ្រវីក្បាលបដិសេធថា គ្មានប្រាក់ឯណាទៅខ្ជះខ្ជាយរឿងកែសម្ផស្សដើមទ្រូងនោះទេ។
បន្ថែមលើការនិយាយបដិសេធនេះ ពេជ្រ អាវីហ្សា បានឲ្យដឹងថា សម្រាប់នាងពិតជាគ្មានហេតុផលអ្វីដែលត្រូវនិយាយលាក់បាំងនោះទេ។ អាវីហ្សា បាននិយាយថា៖«បើខ្ញុំកែសម្ផស្ស មែន ខ្ញុំប្រាប់ហើយ ព្រោះរឿងនេះគ្មានអ្វីជាអាថ៌កំបាំងនោះទេ ដូចរឿងខ្ញុំនិយាយពីការកែច្រមុះអ៊ីចឹង បើខ្ញុំមានគម្រោង វាជាការពិតនោះ ខ្ញុំនឹងនិយាយតាមត្រង់តែម្តង»៕
