អ្នកភូមិបឹងកក់ធ្វើការតវ៉ាឲ្យមានការដោះលែងស្រ្តី ១៥នាក់ពីពន្ធនាគារព្រៃស
នៅព្រឹកថ្ងៃទី ៣១ ឧសភា ២០១២នេះ អ្នកភូមិបឹងកក់ប្រមាណជាង១០០នាក់ បាននាំគ្នាឈរស្រែកទាមទារឲ្យក្រសួងយុត្តិធម៌ជួយអន្តរាគមន៍ដោះលែងស្ត្រី១៥ នាក់ដែលបានជាប់ពន្ធនាគារដោយសារតែក្រាញការពារផ្ទះរបស់ខ្លួន។
ក្រុមអ្នកតវ៉ា បានស្រែករកយុត្តិធម៌ រួមទាំងបានច្រៀងបន់ស្រន់ទេវតា ។ ក្មេងតូចៗ ប្រុសស្រីដែលម្តាយរបស់ពួកគេត្រូវបានតុលាការក្រុងភ្នំពេញចាប់ដាក់ពន្ធនាគារបានស្រែកថា ពួកគេគ្មានម្តាយ ដើម្បីឲ្យលុយទៅសាលារៀននោះទេ។
សូម រំលឹកថា ស្រ្តីចំនួន១៥ នាក់ ត្រូវអាជ្ញាធរចាប់ខ្លួននៅពេលក្រាញតវ៉ារឿងដីធ្លី នៅបឹងកក់កាលពីថ្ងៃទី២៤ ឧសភា ហើយបន្ទាប់មកតុលាការក្រុងភ្នំពេញបានចោទប្រកាន់ទោសឲ្យជាប់ ពន្ធនាគារចំនួន២ឆ្នាំ៦ខែ។ បន្ទាប់ពីពេលនោះមក អ្នកភូមិបឹងកក់បាននាំគ្នាទៅតវ៉ាដល់ ពន្ធនាគារព្រៃស តវ៉ានៅមុខតុលាការក្រុង នៅមន្ទីររដ្ឋសភា ប៉ុន្តែពុំបានលទ្ធផលនោះឡើយ៕
