ប្រធានាធិបតីស្តីទីអេហ្ស៊ីបសន្យារៀបចំការបោះឆ្នោតមុនឆ្នាំ២០១៤
នៅល្ងាចថ្ងៃចន្ទម្សិលមិញនេះ ប្រធានាធិបតីស្តីទីអេហ្ស៊ីប Adly Mansour បានប្រកាសថានឹងរៀបចំអោយមានការបោះឆ្នោតប្រធានាធិបតីនៅអេហ្ស៊ីប អោយបានមុនឆ្នាំ២០១៤ខាងមុខនេះ។ ខុសពីពេលដែលអតីតប្រធានាធិបតីអូស្ន៊ី មូបារ៉ាក់ ទើបទំលាក់ចេញពីតំណែង នៅលើកនេះ អេហ្ស៊ីបនឹងរៀបចំការបោះឆ្នោតប្រជាមតិលើរដ្ឋធម្មនុញ្ញជាមុនសិន មុននឹងអោយប្រជាជនបោះឆ្នោតរើសប្រធានាធិបតី។ គំរោងនយោបាយនេះ ត្រូវបានក្រុមភាតរអ៊ីស្លាមបរិហាររិះគន់ ដោយលើកឡើងថាក្រិត្យច្បាប់រៀបរៀងដោយក្រុមបះបោរប្រដាប់អាវុធដែល ទំលាក់ប្រធានាធិបតីមរស៊ីនោះ នឹងមិនផ្លាស់ប្តូរស្ថានភាពនៅអេហ្ស៊ីបនោះទេ។
គំរោង បោះឆ្នោតលើកនេះ គឺខុសពីពេលដែលអេហ្ស៊ីបទើបនឹងទំលាក់អតីតប្រធានាធិបតី អូស្ន៊ី មូបារ៉ាក់រួច កាលពីឆ្នាំ២០១១។ គឺថាអេហ្ស៊ីបនឹងរៀបចំអោយមានការបោះឆ្នោតប្រជាមតិលើគំរោង រដ្ឋធម្មនុញ្ញជាមុនសិន ទើបអាចអោយការបោះឆ្នោតប្រធានាធិបតីប្រព្រឹត្តទៅតាមក្រោយ។ ប្រធានាធិបតីស្តីទី Adly mansour បានសន្យាថា នឹងរៀបអោយការបោះឆ្នោតទាំងនេះប្រព្រឹត្តទៅបាននៅមុនឆ្នាំ២០១៤។
នៅពេលនេះ រដ្ឋាភិបាលបណ្តោះអាសន្នត្រូវតែបង្កើតអោយបាននូវគណៈ កម្មាធិការពីរដែលមានសមាជិតតំណាងអ្នកជំនាញច្បាប់ និងសង្គម។ គណៈកម្មាធិការទាំងពីរនេះ មានពេល៤ខែដើម្បីតាក់តែងរដ្ឋធម្មនុញ្ញ។ ដោយឡែក រដ្ឋធម្មនុញ្ញអេហ្ស៊ីបនៅតែរក្សាទុកនូវច្បាប់គ្រឹះអ៊ីស្លាមដដែល។ នៅពេលនេះដែរ ប្រធានាធិបតីស្តីទីជាអ្នកកាន់កាប់អំណាចនិតិបញ្ញត្តិហើយអាចអនុម័ត ក្រិត្យច្បាប់ស្របទៅតាមរដ្ឋាភិបាល។ ទោះយ៉ាងនេះក្តី រដ្ឋាភិបាលបណ្តោះអាសន្នអេហ្ស៊ីបនៅមិនទាន់មាននាយករដ្ឋមន្ត្រី នៅឡើយ។
ការប្រកាសគំរោងបោះឆ្នោតរបស់ប្រធានាធិបតីស្តីទីអេហ្ស៊ីប ធ្វើឡើងបន្ទាប់ពីអេហ្ស៊ីបបានធ្លាក់ក្នុងអំពើហិង្សាសារជាថ្មី ដោយនៅព្រឹកថ្ងៃចន្ទម្សិលមិញ ការប្រឈមមុខគ្នារវាងបាតុករក្រុមភាតរអ៊ីស្លាមនិងក្រុមយោធា បានបង្កអោយមានមនុស្សស្លាប់៥០នាក់។ ក្រុមភាតរអ៊ីស្លាមបានអំពាវនាវសកម្មជនរបស់ខ្លួនអោយបះបោរប្រឆាំង យោធានៅទូទាំងប្រទេស។ នៅល្ងាចថ្ងៃចន្ទដដែល ជនជាតិអ៊ីស្លាមជាច្រើននាក់នៅបន្តបាតុកម្មខ្លួននៅឡើយ។ អាមេរិកបានសុំអោយយោធាអេហ្ស៊ីបមានការអត់ធ្មត់។ ប៉ុន្តែមិនបានគ្រោងនឹងផ្តាច់ជំនួយដល់យោធាប្រទេសនេះឡើយ៕ដោយ ព្រំ សឿន សូលីណា (RFI)
