ផ្តល់រង្វាន់ ៧លានរៀលដល់ពលរដ្ឋ ដែលផ្តល់ព័ត៌មានឈានដល់ការចាប់ខ្លួន ឈូក បណ្ឌិត
Cambodia News
ភ្នំពេញ៖ អ្នកស្រលាញ់យុត្តិធម៌នៅកម្ពុជា សន្យាផ្តល់ប្រាក់លើកទឹកចិត្ត ៧លានរៀល ដល់អ្នកដែលបានចាប់ខ្លួនជនជាប់ចោទបាញ់កម្មករ លោក ឈូក បណ្ឌិត មកផ្តន្ទាទោស តាមបញ្ជារបស់តុលាការ ខណៈជនជាប់ចោទរូបនោះកំពុងលាក់ខ្លួន។
ការប្រកាសផ្តល់ប្រាក់លើកទឹកចិត្តនេះ ធ្វើឡើងខណៈដែលជនជាប់ចោទ ជាអតីតមន្ត្រីមានអំណាច លោក ឈូក បណ្ឌិត កំពុងមានសេរីភាពនៅក្រៅឃុំនៅទ្បើយ បើទោះបីតុលាការបានចេញដីកាបង្គាប់ឲ្យចាប់ខ្លួន កាលពីចុងខែមិថុនា ឆ្នាំ២០១៣ ក៏ដោយ។
គេហទំព័រសារព័ត៌មានដើមត្នោត ឲ្យដឹងថា ទឹកប្រាក់នោះបានពីប្រជាពលរដ្ឋ និងអ្នកសារព័ត៌មាន មួយចំនួន ស្ម័គ្រចិត្តបរិច្ចាគថវិកាផ្ទាល់ ខ្លួន ដើម្បីលើកទឹកចិត្តដល់ពលរដ្ឋ ឬសមត្ថកិច្ច ដែលសហការគ្នា ឈានទៅរកចាប់ខ្លួនជនជាប់ចោទ លោក ឈូក បណ្ឌិត។
កាលពីថ្ងៃ២៥ ខែមិថុនា ឆ្នាំ២០១៣ សាលាដំបូងខេត្តស្វាយរៀង បានចេញដីកាបង្គាប់ឲ្យសមត្ថកិច្ច តាមចាប់ខ្លួន លោក ឈូក បណ្ឌិត មកផ្តន្ទាទោស ដាក់ពន្ធនាគារ ១៨ខែ រឿងបាញ់កម្មការនីបីនាក់ឲ្យរងរបួស នៅក្រុងបាវិត កាលពីថ្ងៃទី២០ ខែកុម្ភៈ ឆ្នាំ២០១២ និងបង្គាប់ឲ្យបង់ប្រាក់៣៨លានរៀល ដល់ជនរងគ្រោះ ប៉ុន្តែមកដល់ពេលនេះ សមត្ថកិច្ច មិនទាន់ដឹងថា លោក ឈូក បណ្ឌិត កំពុងលាក់ខ្លួននៅទីណានៅឡើយទេ៕
