ហ៊ុន សែន ប្រកាសផ្តល់រង្វាន់ដល់អ្នក ដែលបំផ្លាញស្លាកគណបក្ស
Cambodia News
កំពង់ចាម៖ ក្នុងពិធីបញ្ចុះខណ្ឌសីមា វត្ដគិរីមុនីសារវ័នជើងព្រៃ ខេត្តកំពង់ចាម នាព្រឹកថ្ងៃទី ២៤ ខែមិថុនា នេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា កន្លងទៅមានការ បំផ្លាញស្លាកគណបក្សនយោបាយមួយចំនួន ហើយអាជ្ញាធរ និងសមត្ថកិច្ចគ្រប់លំដាប់ថ្នាក់ ត្រូវធ្វើការស្រាវជ្រាវលើរឿងនេះ បើទោះបីបោះឆ្នោតហើយក៏ដោយ ឬដល់អាណត្ដិទី៦ ដល់អាណត្ដិទី៧។
ការបញ្ជាក់យ៉ាងដូច្នេះ ដើម្បីកុំឲ្យ ចោទប្រកាន់ មកលើអាជ្ញាធរ និងសមត្ថកិច្ច ឬគណបក្សប្រជាជនដូច្នេះ ត្រូវតែធ្វើការស្រាវជ្រាវ ទោះបី ១ ឆ្នាំដល់ ១០ ឆ្នាំក៏ដោយ ដើម្បីធ្វើឲ្យស្អាត ស្អំដល់អាជ្ញាធរ។ លោកនាយករដ្ឋមន្ត្រី ហ៊ុន សែន បានសង្កត់ធ្ងន់ថា អ្នកណាក៏ដោយ ត្រូវតែទទួលខុសត្រូវ រាប់ទាំងសមាជិកគណបក្សប្រជាជន ហើយមិនមានអភ័យឯកសិទ្ធិនោះទេ។
លោក ហ៊ុន សែន បានអំពាវនាវ ដល់ជនទាំងនេះ ចេញមកសារភាព ហើយ និងទទួលបានរង្វាន់ ឲ្យតែប្រាប់ពីមេខ្លោងរបស់ខ្លួន ទាំងនៅក្នុងគណបក្សប្រជាជន។ លោក ហ៊ុន សែនបានសង្កត់ធ្ងន់ថា ទង្វើខាងលើនេះមិនមែនជាសកម្មភាព សមាជិករបស់គណបក្សប្រជាជនឡើយ។
លោកនាយករដ្ឋមន្ត្រី ហ៊ុន សែន បានបង្ហាញ ការការពារសន្ដិសុខ ដល់ជនទាំងឡាយណា ដែលចេញមកសារភាព។ លោក ហ៊ុន សែន បានលើកឡើងពីការព្រួយបារម្ភ រហូតដល់មានការធ្វើឃាត ដើម្បីបំបិទមាត់ដូច្នេះសមត្ថកិច្ចទាំងអស់ ត្រូវតាមដាន និងការពារមុខសញ្ញាទាំងនោះ៕
