មន្ត្រី យោធាម្នាក់បើករថយន្តបុកបង្គោលស្លាកយីហោក្រឡាប់បោកក្បាលបាក់កស្លាប់
ភ្នំពេញ ៖ កាលពីវេលាម៉ោង ២១និង ២០ នាទីយប់ថ្ងៃទី ១០ ខែមិនា មន្ត្រីយោធាសក្កិ ៣ ម្នាក់បើករថយន្តក្នុងល្បឿនលឿនតាមបណ្ដោយផ្លូវជាតិលេខ៣ ហើយបានរេចង្កូតបុករះបង្គោលស្លាកយីហោភោជនីដ្ឋាន មួយកន្លែង នៅតាមបណ្ដោយផ្លូវជាតិលេខ ៣ មុខភោជនីដ្ឋាន ហេង ហេង ក្នុងភូមិព្រៃ សង្កាត់ចោមចៅ ខណ្ឌពោធិ៍សែនជ័យ បណ្ដាលឲ្យរថយន្តក្រឡាប់បីត្រឡប់ និងមន្ត្រីយោធាបោកក្បាលទៅនឹងកញ្ជាក់រថយន្តធ្លាយខួរ បាក់កស្លាប់ភ្លាម់នៅនឹងកន្លែងកើតហេតុ។
មន្ត្រីយោធាដែលស្លាប់ក្នុងហេតុការណ៍ខាងលើនេះមានឈ្មោះ ឆម សិទ្ធិស័ក្ក អនុសេនីយ៍ឯក បម្រើការនៅកងយោធពលខេមរភូមិន្ទ ភេទប្រុស អាយុ ៣៧ ឆ្នាំ ស្នាក់នៅផ្ទះលេខ ៤២ ផ្លូវ ៦១ សង្កាត់វត្តភ្នំ ខណ្ឌដូនពេញ បានបើករថយន្តម៉ាក រេហ្វ័រ ពណ៌ខ្មៅ។
មុនពេលកើតហេតុ មន្ត្រីយោធាដែលស្លាប់ក្នុងហេតុការណ៍ខាងលើនេះ បានបើកបរតាមបណ្ដោយផ្លូវជាតិលេខ ៣ ក្នុងទិសដៅពីត្បូងទៅជើង គឺពីខេត្តកំពតឆ្ពោះមករាជធានីភ្នំពេញ ដោយបានបើករថយន្តក្នុងល្បឿនយ៉ាងលឿន ហាក់បីដូចជាស្ថិតក្នុងស្ថានភាពស្រវឹងស្រាអញ្ចឹង ខណៈបើកទៅដល់ចំណុចកើតហេតុខាងលើ បានរេចង្កូតទៅ ខាងស្តាំដៃ ជ្រុលបង្គោលស្លាកយីហោភោជនីដ្ឋាន ហេង ហេង បណ្ដាលឲ្យបាក់រៀបស្មើរដី ហើយរថយន្តបន្តបុករះរបស់របរមួយចំនួនទៀត បណ្ដាលឲ្យរថយន្តក្រឡាប់ជាច្រើនត្រឡប់ និងមន្ត្រីជាអ្នកបើករថយន្តបង្កហេតុវិញនោះបានបោកក្បាលផ្ទប់ទៅ នឹងកញ្ជាក់រថយន្ត បាក់កស្លាប់នៅនឹង កន្លែងកើតហេតុ។
ក្រោយពីកើតហេតុនគរបាលចរាចរណ៍ខណ្ឌពោធិ៍សែនជ័យបានសហការជាមួយ នគរបាលជំនាញចុះវាស់វែងស្ទូចយករថយន្តបង្កហេតុទៅរក្សាទុកនៅ ការិយាល័យចរាចរណ៍ជើងគោករាជធានីភ្នំពេញដើម្បីរង់ចាំដោះស្រាយតាម ផ្លូវច្បាប់៕ ហេង នាង
