ខណ្ឌចំនួនបីនៅភ្នំពេញ នឹងត្រូវផ្អាកអគ្គិសនីបណ្តោះអាសន្ន
សារព័ត៌មាន Cambodia News/
ភ្នំពេញ (០៥ មិថុនា ២០១៤) ៖ អគ្គីសនីកម្ពុជា ប្រកាសថាតំបន់មួយចំនួននៅខណ្ឌចំនួនបីនៅភ្នំពេញ គឺខណ្ឌមានជ័យ ពោធិ៍សែនជ័យ និងខណ្ឌឬស្សីកែវ នឹងត្រូវផ្អាកអគ្គិសនីបណ្តោះអាសន្នចាប់ពីថ្ងៃទី ០៥ ខែមិថុនានេះ ដើម្បីអនុវត្តការងារជួសជុល ថែទាំ និងដំឡើងបរិក្ខារ គម្រោងនៃការផ្អាកផ្គត់ផ្គង់អគ្គិសនី មានរយៈពេល៤ថ្ងៃ។
សេចក្តីជូនដំណឹងរបស់អគ្គិសនីកម្ពុជា ឲ្យដឹងថា នៅថ្ងៃព្រហស្បតិ៍ទី០៥ខែមិថុនា ឆ្នាំ២០១៤ ចាប់ពីម៉ោង៨:០០ដល់ម៉ោង១៧:០០ នឹងផ្អាកការផ្គត់ផ្គង់អគ្គិសនី ក្នុងតំបន់ភ្លើងមួយចំនួន ដែលស្ថិតនៅតាម បណ្តោយផ្លូវទំនប់អូស្ត្រាលី ចាប់ពីភូមិត្នោតជ្រុំក្នុងសង្កាត់បឹងទំពុន ខណ្ឌមានជ័យ រហូតដល់ស្ពានចម្ការដូងុ។
រួមទាំងតំបន់ភ្លើងមួយចំនួនដែលស្ថិតនៅតាមបណ្តោយផ្លូវជើងឯក ចាប់ពីគល់ស្ពានចម្ការដូង រហូតដល់ភូមិសំបូរក្នុងសង្កាត់ដង្កោខណ្ឌដង្កោ តំបន់ភ្លើងនៅភូមិដើមគរ ក្នុងសង្កាត់ព្រែកតាសេក ខណ្ឌឫស្សីកែវ និងតំបន់ភ្លើងមួយចំនួន នៅតាមបណ្តោយផ្លូវវ៉េងស្រេង ចាប់ពីភូមិទ្រាសង្កាត់ស្ទឹងមានជ័យ ខណ្ឌមានជ័យរហូតដល់ភូមិត្រពាំងថ្លឹង ក្នុងសង្កាត់ចោមចៅខណ្ឌពោធិ៍សែនជ័យរាជធានីភ្នំពេញ។
សេចក្តីប្រកាសបន្តថា នៅថ្ងៃសុក្រទី០៦ខែមិថុនា ឆ្នាំ២០១៤ ចាប់ពីម៉ោង៨:០០ដល់ ម៉ោង១៧:០០ នឹងផ្អាកការផ្គត់ផ្គង់អគ្គិសនី នៅភូមិទឹកថ្លា ភូមិសេប៉េសេ ក្នុងសង្កាត់ទឹកថ្លា ភូមិដីថ្មីក្នុងសង្កាត់ភ្នំពេញថ្មី ខណ្ឌសែនសុខ តំបន់ភ្លើងនៅភូមិដើមគរក្នុងសង្កាត់ព្រែកតាសេកខណ្ឌឫស្សីកែវ និងតំបន់ភ្លើងនៅតាមបណ្តោយផ្លូវវ៉េងស្រេងចាប់ពីភូមិទ្រាសង្កាត់ ស្ទឹងមានជ័យ ខណ្ឌមានជ័យរហូតដល់ភូមិត្រពាំងថ្លឹង ក្នុងសង្កាត់ចោមចៅខណ្ឌពោធិ៍សែនជ័យ រាជធានីភ្នំពេញ។
ចំណែកនៅថ្ងៃសៅរ៍ ទី០៧ ខែមិថុនា ឆ្នាំ២០១៤ ចាប់ពីម៉ោង៨:០០ដល់ម៉ោង១៧:០០ នឹងផ្អាកការ ផ្គត់ផ្គង់អគ្គិសនី នៅក្នុងតំបន់ភ្លើងមួយចំនួនដែលស្ថិតនៅតាមបណ្តោយផ្លូវជើងឯក ចាប់ពីភូមិសំបូរ ក្នុងសង្កាត់ដង្កោ រហូតដល់ភូមិព្រែកប្រណាក់ ក្នុងសង្កាត់ជើងឯក ខណ្ឌដង្កោ និងតំបន់ភ្លើងលេខ ប.ត ៣០៦,p០០៨,p៦៣០ ស្ថិតនៅក្នុងសង្កាត់និរោធខណ្ឌមានជ័យ រាជធានីភ្នំពេញ។
ចំណែកនៅថ្ងៃអាទិត្យទី០៨ ខែមិថុនា ឆ្នាំ២០១៤ ចាប់ពីម៉ោង៨:០០ដល់ម៉ោង១៧:០០ នឹងផ្អាកការផ្គត់ផ្គង់អគ្គិសនីនៅក្នុងតំបន់ភ្លើងមួយចំនួនដែល ស្ថិតនៅតាមបណ្តោយផ្លូវជាតិលេខ២១ចាប់ពីសង្កាត់តាខ្មៅ ក្នុងក្រុងតាខ្មៅ រហូតដល់ភូមិទូលក្រសាំង ឃុំរកាខ្ពស់ក្នុងស្រុកស្អាងខេត្តកណ្តាល និងតំបន់ភ្លើងលេខប.ត ៣០៦,p០០៨,p៦៣០ស្ថិតនៅក្នុងសង្កាត់និរោធ ខណ្ឌមានជ័យ រាជធានីភ្នំពេញ៕
