ចោរ ២នាក់ស្ទាក់ប្លន់បុរស ២នាក់ឪពុកនិងកូន
ភ្នំពេញ ៖ កាលពីវេលា៣និង១០នាទីព្រឹក ថ្ងៃទី១៣ ខែកុម្ភៈ យុវជនសង្ស័យជាចោរប្លន់ម្នាក់ ត្រូវបានម្ចាស់ម៉ូតូចាប់ខ្លួនប្រគល់ឱ្យនគរបាលប៉ុស្ដិ៍ថ្លា ម្នាក់គេចខ្លួន ខណៈពួកគេទាំង២នាក់ស្ទាក់វាយ និងយកកាំបិតប៉័ងបំណងប្លន់ នៅតាមបណ្ដោយផ្លូវបេតុង ក្រុមទី៣ ភូមិត្រញំងឈូក សង្កាត់ទឹកថ្លា ខណ្ឌសែនសុខ ។
ជនសង្ស័យដែលត្រូវបានឃាត់ខ្លួន ឈ្មោះ ហាក់ សំណាង អាយុ២១ឆ្នាំ មុខរបរកម្មកររោងចក្រ ស្នាក់នៅផ្ទះជួល ភូមិត្រញំងឈូក សង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិក្រាំងព្រៃផ្ដៅ ឃុំក្រាំងយ៉ង ស្រុកពាមជរ ខេត្ដព្រៃវែង និងបក្ខពួកម្នាក់ទៀតរត់គេចខ្លួនឈ្មោះ ឌឿន ដែន អាយុ២៣ឆ្នាំ មុខរបរមិនពិតប្រាកដ ស្រុកកំណើតជាមួយគ្នា ។
ម៉ូតូជនរងគ្រោះម៉ាកស្មាសវី ពណ៌ខ្មៅ ពាក់ស្លាកលេខភ្នំពេញ ១BC-២១២៦ ។ ចំណែកជនរងគ្រោះជាឪពុកឈ្មោះ តូច ចំរើន អាយុ៤៧ឆ្នាំ មុខរបរ បើកបររថយន្ដដឹកប្រេងភីធីធី និងកូនប្រសាឈ្មោះ ឡាយ ចិត្រា អាយុ២១ឆ្នាំ ស្នាក់នៅភូមិអូរបែកក្អម សង្កាត់ទឹកថ្លា ខណ្ឌសែនសុខ ។
ជនរងគ្រោះបានឱ្យដឹងថា មុនពេលកើតហេតុគាត់និងកូនប្រសា បានចេញដំណើរពីផ្ទះដើម្បីទៅធ្វើការនៅកំបូល មកដល់កន្លែងកើតហេតុ ជនសង្ស័យ២នាក់ស្ទាក់វ៉ៃប្រុងប្លន់យកម៉ូតូ ពេលនោះក៏មានការប្រតាយប្រចាប់ ធ្វើឱ្យជនសង្ស័យភ័យក៏ព្យាយាមរត់ ប៉ុន្ដែត្រូវឃាត់ខ្លួនបានម្នាក់ប្រគល់សមត្ថកិច្ច ។
បច្ចុប្បន្ន ជនសង្ស័យត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌសែន សុខ និងម្នាក់ទៀតកំពុងស្រាវជ្រាវស្វែងរកចាប់ខ្លួន ៕ ហេង នាង
