អាជ្ញាធរភ្នំពេញ ហាមមិនឲ្យប្រើម៉ាស៊ីនថតរូប និងវីដេអូ បំពាក់លើយន្តហោះ បញ្ជាថតរាជធានីភ្នំពេញ
សារព័ត៌មាន Cambodia News/
អត្ថបទ៖ ហេង នាង/
ភ្នំពេញ (១៦ កុម្ភៈ ២០១៥)៖ កន្លងមកកាលពីពេលថ្មីៗនេះ មានក្រុមហ៊ុនទូទេស្សន៍ឯកជនមួយចំនួន និងបុគ្គលឯកជនខ្លះបានប្រើប្រាសម៉ាស៊ីនថតរូប និងវីដេអូ ដែលបំពាក់លើយន្តហោះបញ្ជាដោយម៉ាស៊ីនស្វ័យប្រវត្ត (Drone) ក្នុងការផ្តិតយករូបភាពធ្វើឲ្យប៉ះពាល់ដល់សិទ្ធរស់នៅជាឯកជនរបស់ប្រជាពលរដ្ឋទូទៅ និងឈានដល់ការប៉ះពាល់ដល់សន្តិសុខសណ្តាប់ ធ្នាប់សាធារណ: ព្រមទាំងបង្កនូវភាពអសកម្មមួយចំនួនទៀត។
យោងតាមសេចក្តីជូនដំណឹងរបស់សាលារាជធានីភ្នំពេញ កាលពីថ្ងៃទី១៦ ខែកុម្ភៈ ឆ្នាំ២០១៥ បានឲ្យដឹងថា ដោយមើលឃើញពីបញ្ហាបែបនេះ សាលារាជធានីភ្នំពេញចេញសេចក្តីជូនដំណឹងហាមឃាត់ការបង្ហោះកាមេរ៉ាវីដេអូ និងថតរូបបំពាក់លើយន្តហោះបញ្ជា Drone ក្នុងភូមិសាស្រ្តរាជធានីភ្នំពេញ ដើម្បីការពារភាពអនាធិបតេយ្យដែលក្រុមហ៊ុន ឬបុគ្គលមួយចំនួនបានប្រើប្រាស់ឧបករណ៏នេះ។
តាមសេចក្តីជូនដំណឹងដដែលបានឲ្យទៀតដឹងថា ដើម្បីធានាឲ្យបាននូវការគោរពសិទ្ធិរបស់ប្រជាពលរដ្ឋ និងរក្សាឲ្យបាននូវសន្តិសុខសុវត្ថិភាព និងសណ្តាប់ធ្នាប់សាធារណ:សាលារាជធានីភ្នំពេញសូមហាមមិនឲ្យមានការវប្រើប្រាស់ឧបករណ៍ខាងលើនៅភូមិសាស្ត្ររាជធានី ភ្នំពេញជាដាច់ខាត ចំពោះករណីចាំបាច់ក្នុងការប្រើប្រាស់ត្រូវសុំការអនុញ្ញាតឲ្យបានត្រឹមត្រូវពីអាជ្ញាធររាជធានីភ្នំពេញជាមុនសិន។
សាលារាជធានីភ្នំពេញ សង្ឃឹមជឿជាក់ថា សាធារណជនទាំងអស់ នឹងចូលរួមអនុវត្ត តាមសេចក្តីជូនដំណឹងខាងលើ ប្រកបដោយមាន ការទទួលខុសត្រូវខ្ពស់ ទទួលបានសេចក្តីជូនដំណឹងនេះ អាជ្ញាធរគ្រប់លំដាប់ថ្នាក់ ត្រូវសហការអនុវត្ត និងផ្សព្វផ្សាយ ឲ្យមានប្រសិទ្ធភាព ព្រមទាំងចាត់វិធានការផ្លូវច្បាប់ ចំពោះអ្នកប្រព្រឹត្តល្មើស៕
