ជិះម៉ូតូទៅបុកម៉ូតូរ៉ឺម៉កដឹកត្រីរងរបួសបាក់ភ្លៅនារីម្នាក់
ភ្នំពេញ៖ កាលពីវេលាម៉ោង១និង៣០នាទីរំលងអាធ្រាត្រ ឈានចូលថ្ងៃទី១៨ ខែមករា មនុស្សពីរនាក់រងរបួសស្រាល និងម្នាក់ទៀតរងរបួសបាក់ជើង ក្នុងខណៈដែលពួកគេជិះម៉ូតូមួយគ្រឿងឌុបគ្នាចេញពីក្លឹបកម្សាន្តឌឺ ម៉ូន ហើយបុកជាមួយរ៉ឺម៉កដឹកត្រី ពេញទំហឹងនៅចំណុចមុខក្លឺប តាមបណ្ដោយផ្លូវមុនីរ៉េត ក្នុងសង្កាត់ស្ទឹងមានជ័យ ខណ្ឌមានជ័យ ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេសង្កេតឃើញ យុវជនម្នាក់ជិះម៉ូតូសេ១២៥ ពណ៌ខ្មៅ ឌុបនារីម្នាក់ចេញពីក្លឺបកម្សាន្តឌឺម៉ូន ខណៈជិះមកដល់ចំណុចផ្លូវព្រះមុនីរ៉េត ក៏ត្រូវរ៉ឺម៉ក ដឹកត្រីដែលកំពុងបើកបរក្នុងល្បឿនលឿន បានជ្រុលបុកម៉ូតូជនរងគ្រោះទាំងបីនាក់ពេញទំហឹងតែម្តង ដែលបណ្ដាលឲ្យនារីម្នាក់ ត្រូវរងរបួសបាក់កជើងទាំងសងខាង ត្រូវបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរសូវៀត ចំណែកឯម៉ូតូរួញក្បាលកៀបជាប់និងម៉ូតូរ៉ឺម៉ក រងការខូចខាតទាំងស្រុង។
ក្រោយពេលហេតុ សមត្ថកិច្ចនគរបាលចរាចរ ខណ្ឌមានជ័យចុះវាស់វែងនាំយករ៉ឺម៉កដឹកត្រីនិងម៉ូតូយកទៅ អធិការដ្ឋាននគរបាលខណ្ឌមានជ័យ ដោះស្រាយតាមច្បាប់៕
ដោយ៖ ហេង នាង
