សម រង្ស៊ី ថា ការធ្វើបាតុកម្មបីថ្ងៃ អាចនឹងមានការដើរតាមផ្លូវ
ភ្នំពេញ៖ ប្រធានគណបក្សប្រឆាំង លោក សម រង្ស៊ី បាននិយាយនៅព្រលានយន្តហោះថា ការធ្វើមហាបាតុកម្មនៅថ្ងៃទី១៥ ខែកញ្ញា ខាងមុខនេះ នឹងអាចមានការដើរដង្ហែក្បួន ដោយមិនត្រឹមតែអង្គុយមួយ កន្លែងនោះឡើយ។
ការអធិប្បាយ របស់លោក គឺខុសពីការស្នើសុំរបស់គណបក្សសង្គ្រោះជាតិ ផ្ញើទៅកាន់សាលាក្រុងភ្នំពេញ ដែលសុំធ្វើមហាបាតុកម្មនៅទីលានប្រជាធិបតេយ្យ។ នៅពេលដែលត្រូវ ចោទសួរដោយអ្នកសារព័ត៌មាននោះ លោក សម រង្ស៊ី បាននិយាយថា នៅក្នុងការធ្វើបាតុកម្មរយៈពេលបីថ្ងៃ និងទាំងថ្ងៃ និងយប់ អាចនៅទីកន្លែងនិងដើរ។ ចំពោះការដើរពីណាទៅណា យើងនឹងកំណត់នៅពេលក្រោយ។
លោក សម រង្ស៊ី ធានាថា ការធ្វើមហាបាតុកម្ម នឹងធ្វើឡើងដោយសន្តិវិធីមួយរយភាគរយ ប៉ុន្តែទោះបីជាយ៉ាងណាក៏ដោយចុះ មានការភ័យខ្លាចថា បើសិនជាមានការដើរតាមផ្លូវនោះ វានឹងអាចធ្វើឲ្យមានការពិបាកគ្រប់គ្រងបាតុករ ហើយងាយនឹងមានផ្ទុះចេញជាអំពើហិង្សា៕ Cambodia News
