ម៉ូតូជិះលឿនជ្រុលទៅបុករថយន្តរងរបួសធ្ងន់ម្នាក់
ភ្នំពេញ ៖ កាលពីវេលាម៉ោង១១ យប់ថ្ងៃទី៥ មករា រថយន្តមួយគ្រឿង កំពុងបត់ស្តាំ ស្រាប់តែមានម៉ូតូមួយគ្រឿងជិះគ្នា ២នាក់ ស្រីម្នាក់ ប្រុសម្នាក់ បានជិះម៉ូតូទៅបុកបណ្តាលឲ្យដួលរងរបួសធ្ងន់នារីម្នាក់ អ្នកបើកម៉ូតូ មិនមានរងរបួសទេ ស្ថិតនៅចំណុចវិថីព្រះស៊ីសុវត្ថិកែងវិថីសុរាមិត្រ ក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានពីកន្លែងកើតហេតុ បានឲ្យដឹងថា រថយន្តកាមរីបាឡែន ពណ៌ប្រផេះ ជិះលក្ខណៈក្រុមគ្រួសារមកពីដើរលេង បើកតាមវិថីព្រះសុរាមិត្រ ក្នុងទិសដៅពីកើតទៅលិចបត់ស្តាំ ខណៈពេលកំពុងតែបត់ ស្រាប់តែម៉ូតូស្មាសវី ពណ៌ខ្មៅ ជិះគ្នា២នាក់ ស្រីម្នាក់ ប្រុសម្នាក់ ក្នុងទិសដៅស្របគ្នា ជិះលឿនពេក ចាប់ហ្វ្រាំងមិនទាន់ ជ្រុលទៅបុកកង់ក្រោយខាងស្តាំរថយន្តកំពុងតែបត់ បណ្តាលឲ្យដួលរងរបួសធ្ងន់ នារីជិះពីក្រោយ រីឯអ្នកបើកម៉ូតូ មិនមានរងរបួសទេ ។
ក្រោយពេលកើតហេតុ រថយន្តកាមរីបាឡែន ព្យាយាមបើករត់គេចទៅដល់ផ្លូវលេខ១៤៤ សង្កាត់ផ្សារកណ្តាលទី២ ខណ្ឌដូនពេញ ទើបសមត្ថកិច្ចឃាត់រថយន្តបាន ។ នារីរងគ្រោះត្រូវរថយន្តសង្គ្រោះដឹកយកទៅព្យាបាល នៅគ្លីនិកឯកជន ចំណែករថយន្ត និងម៉ូតូ ត្រូវសមត្ថកិច្ច យកទៅរក្សាទុកនៅខណ្ឌដូនពេញ ៕
