យុវជនម្នាក់ត្រូវរថយន្តដឹកដីកិនបែកក្បាលស្លាប់
ភ្នំពេញ ៖ កាលពីវេលាម៉ោង ២និង ២៥នាទី រសៀលថ្ងៃទី៥ ខែមករា ប្អូនប្រុសរបស់តារាចម្រៀង អ៊ុក ណារីម ត្រូវរថយន្តដឹកដីកិនបែកក្បាលស្លាប់ភ្លាមៗនៅនឹងកន្លែងកើតហេតុ ស្ថិតនៅចំណុចផ្លូវបេតុង កែងផ្លូវភ្នំពេញហាណូយ សង្កាត់ភ្នំពេញថ្មី ខ័ណ្ឌសែនសុខ។
ប្រភពព័ត៌មានបានឲ្យដឹងថា រថយន្តបែនដឹកដីម៉ាកតូយ៉ូតា ពណ៌ខៀវ នៅជាប់នឹងរថយន្ត បិទ ស្លាកមន្ទីរសាធារណការ និងដឹកជញ្ជូនរាជធានីភ្នំពេញ បើកតាមផ្លូវភ្នំពេញហាណូយ ពីត្បូងទៅជើង រួចបត់ឆ្វេងចូលតាមផ្លូវបេតុង ខណៈពេលកំពុងតែបត់ ស្រាប់តែយុវជនម្នាក់ជិះម៉ូតូ ម៉ាកយ៉ាម៉ាហា អ៊ិ សាយធើរ ពណ៌ខ្មៅលាយក្រហម តាមផ្លូវភ្នំពេញហាណូយ ពីជើងទៅត្បូង ខណៈមកដល់ចំណុចខាងលើ បានចាប់ហ្វ្រាំងអូសចូលក្រោមរថយន្ត បណ្តាលឲ្យរថយន្តកិន បែកក្បាលស្លាប់នៅកន្លែងកើតហេតុ។
ជនរងគ្រោះស្លាប់បាត់បង់ជីវិតមានឈ្មោះ អ៊ុក តារា ភេទប្រុស អាយុ២៧ឆ្នាំ ស្នាក់នៅផ្ទះលេខ១៥៥៥ ផ្លូវលំ សង្កាត់ទឹកថ្លា ខណ្ឌសែនសុខ ។ ចំណែកតៃកុងរថយន្ត មានឈ្មោះ គួយ សុនី ភេទប្រុស អាយុ៣២ឆ្នាំ មានទីលំនៅភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។
ក្នុងហេតុការណ៍នោះ ឃើញមានវត្តមានលោកអ៊ុក ណារីម ជាបងប្រុសរបស់ជនរងគ្រោះបាន ទៅដល់កន្លែងកើតហេតុ និងចាត់ចែងដឹកសពប្អូនប្រុសយកទៅធ្វើបុណ្យតាមប្រពៃណីនៅវត្ត ទឹកថ្លា ។ ចំណែករថយន្ត និងម៉ូតូ ត្រូវសមត្ថកិច្ចយកទៅរក្សាទុក នៅការិយាល័យចរាចរណ៍ផ្លូវគោក ៕
ដោយ៖ ហេង នាង
