បុរសម្នាក់ស្រវឹងស្រាជិះម៉ូតូ ទៅបុកអ្នករើសអេតចាយរងរបួសធ្ងន់ខ្លួនឯង
ភ្នំពេញ ៖ កាលពីវេលាម៉ោង១២ និង៤០ នាទី រំលងអធ្រាត្រឈានចូលថ្ងៃទី៤ មករា បុរសម្នាក់ស្រវឹងស្រាជិះម៉ូតូទៅបុកអ្នករើសអេតចាយដើរឆ្លង ផ្លូវ បណ្តាលឲ្យដួលពកក្បាល ចំណែកអ្នកបង្ករងរបួសធ្ងន់ ស្ថិតនៅចំណុចផ្លូវលេខ២៩៤ កែងមហាវិថីព្រះមុនីវង្ស ក្នុងសង្កាត់បឹងកេងកងទី១ ខណ្ឌចំការមន ។
ប្រភពព័ត៌មានបានឲ្យដឹងថា មុនពេលកើតហេតុ បុរសម្នាក់ ស្រវឹងស្រាជិះម៉ូតូម៉ាកសេ១២៥ ស៊េរី២០១២ ពណ៌ខ្មៅ ក្នុងល្បឿនលឿន តាមមហាវិថីព្រះមុនីវង្ស ពីត្បូងទៅជើង ចំណែកជនរងគ្រោះអូសរទេះអេតចាយ យកទៅទុកនៅចិញ្ចើមផ្លូវ រួចដើររើសអេតចាយដើរឆ្លងផ្លូវពីលិចទៅកើត ទៅរើសសំបកកំប៉ុង ស្រាប់តែត្រូវម៉ូតូជិះលឿនក្នុងស្ថានភាពស្រវឹងផង ចាប់ហ្វ្រាំងមិនទាន់ ជ្រុលទៅបុក បណ្តាលឲ្យដួលសន្លប់ទាំងពីរនាក់ តែបន្តិចក្រោយមក ជនរងគ្រោះជាអ្នកដើររើសអេតចាយនោះដឹងខ្លួនវិញ គ្រាន់តែពកក្បាលបន្តិច ចំណែកបុរសអ្នកបុកសន្លប់មិនទាន់ដឹងខ្លួន ត្រូវរថយន្តសង្គ្រោះដឹកយកទៅព្យាបាល នៅគ្លីនិកឯកជន ។
ក្រោយពេលកើតហេតុ ម៉ូតូ និងរទេះអូសអេតចាយ ត្រូវសមត្ថកិច្ចយកទៅរក្សាទុក នៅប៉ុស្តិ៍បឹងកេងកងទី១ ៕
ដោយ៖ ហេង នាង
