សម្តេច ហ៊ុន សែន សុំទោសដែលកម្ពុជាមិនអាចធ្វើម្ចាស់ផ្ទះប្រកួតកីឡាខ្នាតអន្តរជាតិ
សារព័ត៌មាន Cambodia News/
ភ្នំពេញ (០៤ មេសា ២០១៧) ៖ ក្នុងពិធី បើកការដ្ឋាន និងសម្ពោធមណ្ឌលកីឡា នៃពហុកីឡដ្ឋានជាតិថ្មីមួយឈ្មោះថា «មរតកតេជោ» នៅសង្វាត់ព្រែកតាសេក ខណ្ឌជ្រោយចង្វារ នៅព្រឹកថ្ងៃទី៤ខែមេសានេះ សម្តេចតេជោ ហ៊ុន សែន ថ្លែងដោយសុំទោសជនរួមជាតិ ពីការដែលរដ្ឋាភិបាល សុំប្រទេសជាសមាជិកអាស៊ាន ពន្យាធ្វើជាម្ចាស់ផ្ទះសម្រាប់ប្រកួតកីឡាស៊ីហ្គេម រហូតដល់ឆ្នាំ២០២៣។
សម្តេច ហ៊ុន សែន អះអាងថា ការសុំពន្យានេះ ដោយសារតែកម្ពុជា ទើបនឹងងើបពីគំនរផេះផង់នៃសង្គ្រៀមស៊ីវិល ខ្វះធនធានមនុស្ស ខ្វះហេដ្ឋារចនាសម័ន្ធ រួមទាំងថវិកា។
សម្តេចបានថ្លែងលើកទឹកចិត្ត ឲ្យបន្តលើកកម្ពស់វិស័យកីឡា និងថា កម្ពុជា យ៉ាងហោចណាស់ មានរោងចក្រចំនួនពីរ បានផលិតឧបករណ៍ និងសម្ភារកីឡា នាំទៅលក់នៅក្រៅប្រទេស ដូចជារោងចក្រមួយ នៅតំបន់សេដ្ឋកិច្ចពិសេសខេត្តស្វាយរៀង បានផលិតកង់ប្រណាំង និងរោងចក្រមួយទៀត នៅតំបន់សេដ្ឋកិច្ចពិសេស ខេត្តកោះកុង បានផលិតបាល់ទះ៕
