ហាងលក់សម្ភារៈកូនក្មេងមួយកន្លែងត្រូវអគ្គិភ័យឆាបឆេះ
ភ្នំពេញ ៖ កាលពីវេលាម៉ោង ១២និង៤០នាទីថ្ងៃត្រង់ ទី០៣ ខែមករា អគ្គិភ័យកំពុងឆាបឆេះហាងលក់សម្ភារៈកូនក្មេងមួយកន្លែង ស្ថិតនៅតាមបណ្ដោយផ្លូវកម្ពុជាក្រោម ក្នុងសង្កាត់ទឹកល្អក់ទី១ ខណ្ឌទួលគោក ។
ចំពោះការឆាបឆេះហាងលក់សម្ភារៈកូនក្មេងខាងលើនេះ គឺត្រូវបានក្រុមពន្លត់អគ្គិភ័យនៃស្នងការដ្ឋានបានសហការជាមួយនឹង ប៉ូលិសមូលដ្ឋាន រួមជាមួយបងប្អូនប្រជាពលរដ្ឋ អន្តរាគមន៍បាញ់ទឹកពន្លត់ឲ្យអណ្ដាតភ្លើងដែលកំពុងឆាបឆេះរលត់ ក្នុងរយៈពេលដ៏ខ្លី ដោយមិនឲ្យអណ្ដាតភ្លើងរាលដាលដល់លំនៅដ្ឋានផ្សេងទៀតឡើយ ។
ជាជំហានដំបូងសមត្ថកិច្ចបានសន្និដ្ឋានថា អគ្គិភ័យនេះបង្កឡើងដោយសារផ្ទុះសេចរន្តអគ្គិសនី ទើបបង្កឲ្យមានអគ្គិភ័យឆាបឆេះយ៉ាងសន្ធោសន្ធៅបែបនេះ។ ចំពោះការខូចខាតទ្រព្យសម្បត្តិនិងរបស់របរនៅក្នុងផ្ទះនោះគឺ គេមិនទាន់អាចកំណត់បាននៅឡើយទេ៕
ដោយ៖ ហេង នាង
