បើករថយន្តប្រដេញគ្នាជ្រុលចង្កូតបុកដងទង់ជាតិបាក់អស់បួនដើម
ភ្នំពេញ៖ កាលពីវេលាម៉ោង០០និង៥០នាទីយប់រំលងអាធ្រាត្រឈានចូលថ្ងៃទី៣ ខែមករា មានរថយន្តមួយគ្រឿងបានបោះពួយទៅបុកដងទង់ជាតិចំនួនបួនដើម បណ្ដាលឲ្យបាក់ ដែលគេដាក់នៅលើសួនខាងកើត រង្វង់មូលសម្តេចព្រះសង្ឃរាជ ជួនណាត នៅតាមបណ្ដោយផ្លូវមុខរដ្ឋសភាថ្មី ស្ថិតក្នុងសង្កាត់ទន្លបាសាក់ ខណ្ឌចំការមន។
ប្រភព័ត៌មាននៅកន្លែងកើតហេតុបានឲ្យដឹងថា មុនពលកើតហេតុគេ ឃើញរថយន្តមួយគ្រឿងម៉ាក អូឌី ឃ្យូសេវេន ពណ៌ស ពាក់ស្លាកលេខភ្នំពេញ2L6777បើកបរដោយបុរសម្នាក់និងស្ត្រីម្នាក់ ក្នុងល្បឿនលឿន ខណៈ ពេលដែលម្ចាស់រថយន្តនេះ កំពុងបើកបរប្រដេញគ្នាជាមួយនិងរថយន្តមួយគ្រឿងទៀត តាមបណ្ដោយផ្លូវមុខរដ្ឋសភាថ្មី លុះពេលបើកមកដល់ចំណុចខាងកើតរង្វង់មូល សម្តេចព្រះសង្ឃរាជ ជួនណាត ក៏ជ្រុលចង្កូតបោះពួយទៅបុកដងទង់ជាតិដែលគេដាក់នៅសួន បណ្ដាលឲ្យបាក់រាបដល់ដីចំនួនបួនដើម ចំណែកឯរថយន្តវិញរងការខូចខាតផ្នែកខាងមុខយ៉ាងដំណំ ។
ក្រោយពេលកើតហេតុម្ចាស់រថយន្តបង្កហេតុបានបើកទ្វារចុះពីលើរថយន្ត ហើយឡើងទៅជិះរថយន្តមួយគ្រឿងទៀតគេចខ្លួនបាត់។ចំណែក រថយន្តបង្កត្រូវបានសមត្ថកិច្ចមូល ដ្ឋានសហការជាមួយនិងប៉ូលិសជំនាញ ចុះធ្វើការវាស់វែងដកហូតយកទៅរក្សាទូកនៅសាលារាធានីដើម្បីចាត់ការ ទៅតាមផ្លូវច្បាប់៕
ដោយ៖ ហេង នាង
