ភ្លៀងលាយឡំដោយខ្យល់កន្ត្រាក់ បណ្តាលឲ្យខ្ទេចអស់ទីតាំងច្រត់ព្រះនង្គ័ល
សារព័ត៌មាន Cambodia News/
ព្រៃវែង (១១ ឧសភា ២០១៧) ៖ ភ្លៀងមួយមេលាយឡំដោយខ្យល់កន្ត្រាក់ បានបណ្តាលឲ្យស្តង់ពិព័រណ៍មួយចំនួនធំ ដួលរលំស្ទើររាបដល់ដី ដែលស្តង់ទាំងអស់នោះ ត្រូវបានគេរៀបចំសម្រាប់ដាក់តាំងបង្ហាញសមិទ្ធផលរបស់ក្រសួង និងស្ថាប័ននានា នៅក្នុងព្រះរាជពិធីច្រត់ព្រះនង្គ័ល ដែលនឹងប្រារព្ធធ្វើនៅក្នុងស្រុកកំចាយមារ នាពេលខាងមុខ ។
ហេតុការណ៍នេះ បានកើតឡើងកាលពីវេលាម៉ោងប្រមាណ៤រសៀលថ្ងៃទី១០ ឧសភា ដែលពិធីច្រត់ព្រះនង្គ័លនេះ ត្រូវបានត្រៀមរៀបចំធ្វើនៅក្នុងសាកលវិទ្យាល័យកំចាយមារស្ថិតក្នុងភូមិថ្នល់កែង ឃុំស្មើងជើង ស្រុកកំចាយមារ ។
គួរបញ្ជាក់ថា នេះជាលើកទីមួយហើយ ដែលខេត្តព្រៃវែងបានទទួលរៀបចំព្រះរាជពិធីច្រត់ព្រះនង្គ័ល ហើយនៅក្នុងពិធីនេះដែរ ត្រូវបានគេដឹងថា លោក ឮជា សុមេធី គឺជាស្តេចមាឃ និងលោកជំទាវជាភរិយាព្រះមេហួរ ។
ប្រភពពីមន្ត្រីជំនាញបញ្ជាក់ថា ការដួលរលំស្តង់ទាំងអស់នេះ គឺដោយសារតែគ្រោះធម្មជាតិដែលនឹកស្មានមិនដល់ ហើយបច្ចុប្បន្នមន្ត្រីជំនាញក៏កំពុងរៀបចំយ៉ាងញាប់ដៃញាប់ជើងទាំងយប់ទាំងថ្ងៃ ក្នុងការធ្វើស្តង់សាជាថ្មី ដើម្បីឱ្យទាន់កម្មវិធីដែលនឹងប្រារព្ធធ្វើនៅថ្ងៃទី១៤ ខែឧសភា ខាងមុខ ៕
