លំនៅឋានមួយកន្លែងត្រូវអគ្គិភ័យបានឆាបឆេះ
ភ្នំពេញ ៖ កាលពីវេលាម៉ោង ៩និង៥០នាទីព្រឹក ថ្ងៃទី២៦ ខែធ្នូ លំនៅដ្ឋានមួយកន្លែងស្ថិតនៅតាមបណ្តោយផ្លូវលេខ ៣៦៩ ផ្ទះលេខ៣៩៦ ក្រុម៧ ឃុំព្រះពន្លា សង្កាត់ព្រែកប្រា ខណ្ឌមានជ័យ ត្រូវអគ្គិភ័យឆាបឆេះឡើង យ៉ាងសន្ធោសន្ធៅ ក្នុងរយៈពេលយ៉ាងខ្លី ដែលបណ្តាលឲ្យម្ចាស់ផ្ទះរលាកដៃរលាកជើង និងទ្រព្យសម្បត្តិនៅក្នុងផ្ទះត្រូវរងការខូចខាត ។
យោងតាមសេចក្តីរាយការណ៍ពីកន្លែងកើតហេតុ បានឲ្យដឹងថាមុនពេលកើតហេតុ គេបានឃើញម្ចាស់ផ្ទះ បង្កាត់ភ្លើងអាំងត្រី នៅជាន់ជាប់ដីខាងក្រោមផ្ទះ ខណៈនោះ ម្ចាស់ផ្ទះបានឡើងមកជាន់លើ ជជែកគ្នាមួយសន្ទុះ ស្រាប់តែមានអគ្គិភ័យឆាបឆេះចេញពីជាន់ក្រោមដី យ៉ាងសន្ធោសន្ធៅ។ អគ្គិភ័យនេះបានរលត់សូន្យសុងទៅវិញ ក្នុងរយៈពេលតែ១០នាទីប៉ុណ្ណោះ ដោយសារតែ អ្នកជិតខាង រួមសហការជាមួយនិងអាជ្ញាធរមូលដ្ឋានអន្តរាគមន៍ជួយពន្លត់។
ក្នុងហេតុការណ៍ខាងលើនេះ មានរថយន្តពន្លត់អគ្គិភ័យ បង្អែកមានជ័យចំនួន២គ្រឿង បានចុះទៅដល់កន្លែងកើតហេតុ ប៉ុន្តែមិនបានប្រើប្រាស់ឡើយ ដោយសារតែអណ្តាតភ្លើងបានរលត់ទៅវិញ។
ម្ចាស់ផ្ទះដែលត្រូវអគ្គិភ័យឆាបឆេះនេះ ឈ្មោះ សៀង សម្បត្តិ ភេទប្រុស និងអ្នករងរបួសរលាកដៃ រលាកជើង ពីរនាក់ខាងលើនេះ ទី១ឈ្មោះ ថាវី ភេទស្រីអាយុ៥៤ឆ្នាំ ទី២មិនបានស្គាល់អត្តសញ្ញាណ។ អគ្គិភ័យនេះបង្កឡើយដោយសារតែ ប្រេងសាំងហូរចេញពីម៉ូតូនៅលើផ្ទះជាន់ទី១ ធ្លាក់ចំចង្ក្រានអាំងត្រី ក៏បង្កឲ្យមានអគ្គិភ័យនេះឆាបឆេះតែម្តង៕
ដោយ៖ ហេង នាង
