បុរសម្នាក់ឡើងចងកសម្លាប់ខ្លួននៅលើដើមគគីរ
ភ្នំពេញ ៖ កាលពីវេលាម៉ោង ៤ទៀបភ្លឺថ្ងៃទី ១២ ធ្នូ មានការផ្អើលឆោឡោនាំគ្នាទៅមើលបុរសម្នាក់ ឡើងទៅចងកសម្លាប់ខ្លួន នៅលើដើមគគីរ កំខ្ពស់ពីដីប្រមាណ៣ម៉ែត្រ ស្ថិតនៅមុខមន្ទីរពេទ្យព្រះកេតុមាលា តាមផ្លូវលេខ៤៧ ក្នុងសង្កាត់ស្រះចក ខណ្ឌដូនពេញ ។
បុរសរូបនោះបានយកក្រណាត់ចងកនឹងមែកគគីរ ធ្លាក់ស្ទាក ខ្ពស់ផុតពីប្រមាណ ៣ម៉ែត្រ បើសិនជាមិនបានងើយមើលទេ មិនចាប់អារម្មណ៍ដឹងថា មានមនុស្សចងក សម្លាប់ខ្លួន ហើយមិនដឹងថា ចងក តាំងពីពេលណាមកដែរ រហូតដល់ម៉ោងខាងលើ ទើបមានការផ្អើលឆោឡោ។
ប្រភពព័ត៌មាននៅកន្លែងកើតហេតុ បានឲ្យដឹងថា បុរសដែលចងកសម្លាប់ខ្លួន នៅលើដើមគគីរ នោះមានឈ្មោះ គ អាយុជាង ៣០ឆ្នាំ សម្បុរស្រអែម ស្លៀកខោខូវប៊យ អត់ពាក់អាវ តែងតែដើរចុះដើរឡើង នៅកន្លែងកើតហេតុខាងលើនេះ ។
មុនពេលកើត ហេតុ កម្មករកើបសំរាមនៅជិតកន្លែងកើតហេតុនេះ បានងើយទៅលើ ឃើញបុរសម្នាក់ចងកនឹងដើមគគីរនោះ ទើបធ្វើឲ្យផ្អើលឆោឡោដឹងថា មានមនុស្សចងកសម្លាប់ខ្លួន៕
ដោយ៖ ហេង នាង
