ជនសង្ស័យពីរនាក់ត្រូវសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ន
ភ្នំពេញ៖ កាលពីរសៀលថ្ងៃទី២៦ ខែធ្នូ ជនសង្ស័យពីរនាក់ ក្នុងករណីជួញដូរគ្រឿងញៀន ឆ្លងដែនខុសច្បាប់ជិត២៥ គីឡូក្រាម ត្រូវបានសាលាដំបូងរាជធានីភ្នំពេញ សម្រេចឃុំខ្លួន បណ្តោះអាសន្ន នៅក្នុងពន្ធនាគារ
ជនសង្ស័យទាំងពីរនាក់ដែលត្រូវបានឃាត់ខ្លួន ក្នុងករណីជួញដូរគ្រឿងញៀន ប៉ងឆ្លងដែនទៅកាន់ ប្រទេសអូស្ត្រាលីនេះ ទី១ ឈ្មោះ ង៉ាយ៉ិន ណូហាន (Nguyen Nuhand) ភេទស្រី អាយុ៤៤ ឆ្នាំ ជាជនជាតិវៀតណាម និងម្នាក់ទៀតឈ្មោះ សូរ សារឹទ្ធ អាយុ ៥៤ឆ្នាំ ជនជាតិខ្មែរ ជាទាហាន ឋានន្តរស័ក្តិវរសេនីយ៍ឯក។
ជនសង្ស័យទាំងពីរនាក់ ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ លោកអ្នកស្រី សែម ស័ក្កកូឡា សម្រេចឃុំខ្លួនបណ្តោះអាសន្ន នៅពន្ធនាគារព្រៃស ពីបទរក្សាទុកនិងជួយដូរគ្រឿងញៀន ឆ្លងដែនខុសច្បាប់ តាមមាត្រា៤០ នៃច្បាប់ស្តីពីការបង្រ្កាបការ ជួញដូរគ្រឿងញៀនខុសច្បាប់។
សូមបញ្ជាក់ថា នៅថ្ងៃទី២៣ ខែធ្នូ កម្លាំងសមត្ថកិច្ចបានធ្វើការ បង្រ្កាបសកម្មភាពជួញដូរគ្រឿងញៀន ដែលប៉ុនប៉ងនាំចេញទៅ ប្រទេសអូស្ត្រាលីតាមរយៈ បញ្ញើប្រៃសណីយ៍ វាជាប្រភេទហេរ៉ូអ៊ីនដែលមាន ទម្ងន់សុទ្ធជាល្បាយ វត្ថុរាវ ប្រមាណជា ២៤គីឡូក្រាម ហើយពេលយកទៅសម្ងួត អាចទាញយកជាម្សៅគ្រឿងញៀនសុទ្ធ ទម្ងន់ប្រហែល១២គីឡូក្រាម៕
ដោយ៖ ហេង នាង
