លោកហ៊ុន សែន បើកផ្លូវអោយលោកសម រង្ស៊ីសម្រេចចិត្តវិលត្រលប់ដោយខ្លួនឯង
Cambodia News
ភ្នំពេញ៖ កាលពីព្រឹកថ្ងៃទី ១១ មិថុនា លោកនាយករដ្ឋមន្ត្រី ហ៊ុន សែន បានថ្លែងជាសាធារណៈនៅក្នុងពិធីសម្ពោធស្ពាន ឯទីក្រុងពោធិ៏សាត់ថា “ ខ្លួនឯងចេញពីកម្ពុជាទៅ ដោយខ្លួនឯង ឥឡូវចង់ត្រឡប់មកវិញ អត់មានអ្នកណាឃាត់ ចង់ត្រឡប់មកវិញ ម៉េចក៏ មិនម៉ោ។
សេចក្ដីថ្លែងបែបនេះរបស់ លោកនាយករដ្ឋមន្ត្រី ហ៊ុន សែន បានធ្វើឡើងខណៈកាលពីប៉ុន្មានថ្ងៃមុន អាជ្ញាធរថៃបានហាមឃាត់លោក សម រង្ស៊ី មេដឹកនាំគណបក្សសង្គ្រោះជាតិ ដែលជាបក្សប្រឆាំងក្នុងប្រទេសកម្ពុជា មិនឲ្យចូលប្រទេសគេ តែលោក សម រង្ស៊ី បែរជានិយាយថា នោះជាការបញ្ជារបស់រដ្ឋាភិបាលកម្ពុជា ។
គួរបញ្ជាក់ថា លោក សម រង្ស៊ី បាននិរទេសខ្លួនដោយខ្លួនឯងកាលពីអំឡុងខែ តុលា ឆ្នាំ ២០០៩ បន្ទាប់ពីការដកតម្រុយបង្គោលព្រំដែនកម្ពុជា-វៀតណាម នៅស្រុក ចន្ទ្រា ខេត្ត ស្វាយរៀង ។ ក្រោយមកតុលាការកម្ពុជា បានផ្តន្ទាទោសក្នុងសំណុំរឿងនេះ និង ករណីក្លែងផែនទី ដោយតម្រូវឲ្យជាប់ពន្ធនាគារសរុបរយៈពេល ១២ ឆ្នាំ ។ បើទោះជាដូច្នេះក្ដី សំអាងទៅលើអន្តរាគមន៏ពីបរទេស មេដឹកនាំបក្សប្រឆាំងរូបនេះ រំពឹងថា នឹង បានវិលត្រឡប់មកកម្ពុជាវិញ នារយៈពេលខ្លីៗ មុនការបោះឆ្នោត ថ្ងៃទី ២៨ កក្កដា ខាងមុខ ៕