ជំងឺគ្រុនឈាមមានការកើនឡើងនៅឆ្នាំ២០១២
លោកវេជ្ជបណ្ឌិត ង៉ាន់ ច័ន្ទ នាយកកម្មវិធីជាតិប្រយុទ្ធនឹងជំងឺគ្រុនឈាម បានអះអាងថា ជំងឺគ្រុនឈាមកើនឡើង ៤ដងនៅឆ្នាំ២០១២ បើធៀបនឹងឆ្នាំ២០១១ ក្នុងរយៈពេលដូចគ្នា។ ហើយលោកបានឲ្យដឹងថា គិតមកដល់ចុងខែឧសភា ឆ្នាំ២០១២ មានអ្នកជំងឺគ្រុនឈាមមកព្យាបាលក្នុងមន្ទីរពេទ្យរដ្ឋចំនួន ៤.៤៣៤នាក់ ក្នុងនោះមានអ្នកស្លាប់ ២១នាក់។
លោកបានបន្តថា ការបម្រែបម្រួលបរិយាកាស កើនឡើងនូវសីតុណ្ហភាពបានជះឥទ្ធិពលអាក្រក់ដល់ការរីករាលដាលឡើងវិញនៃជំងឺគ្រុនឈាមឲ្យកាន់តែកើនឡើង។ មូសខ្លាដែលជាភ្នាក់ងារចម្លងគ្រុនឈាម បើយើងនិយាយអំពីអេកូឡូស៊ីរបស់វា គឺថា ការខាំរបស់វា មានការកើនឡើង ហើយនិងការពងរបស់វា ដោយសារសីតុណ្ហភាពអំណោយផល ។
នៅឆ្នាំ២០១២ ខេត្តដែលប្រឈមខ្ពស់នៃជំងឺគ្រុនឈាមមានខេត្តកណ្ដាល រាជធានីភ្នំពេញ ខេត្តបន្ទាយមានជ័យ សៀមរាប កំពង់ចាម កំពង់ស្ពឺ ខេត្តតាកែវ ជាដើម។
ក្រសួងសុខាភិបាលបានជួយទប់ស្កាត់បង្ការជំងឺគ្រុនឈាម ដោយចែកថ្នាំអាបេតច្រើនតោនតាមមូលដ្ឋាន និងចែកត្រី៧ពណ៌ ឲ្យលែងក្នុងពាងទឹក រួមទាំងផ្សព្វផ្សាយឲ្យសម្លាប់ដង្កូវទឹក និងពងមូស ដែលវាអាចកើតក្នុងថូផ្កា សំបកកង់រថយន្តចាស់ៗ កន្លែងដាក់អេតចាយជាដើម៕