មន្រ្តីជំនាញក្រសួងឧស្សាហកម្ម ដឹកនាំសិក្ខាកាម ចុះទស្សនកិច្ចសិក្សានៅក្រុមហ៊ុនទឹកត្រី លាង ទ្បេងផលិតពីត្រីកញ្ច្រាញ់ច្រាស់
សារព័ត៌មាន Cambodia News/
ភ្នំពេញ ៖ លោក ទឹម រិទ្ធី ប្រធានការិយាលយ័បណ្តុះបណ្តាលពិគ្រោះយោបល់ និងផលិតភាព នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានដឹកនាំសិក្ខាកាមចំនួន ៣៥ នាក់ ចុះទៅទស្សនកិច្ចសិក្សា នៅក្រុមហ៊ុនទឹកត្រី លាង ទ្បេង ហៅទឹកត្រីកញ្ច្រាញ់ច្រាស់ ដើម្បីសិក្សាបន្ថែមអំពីប្រពន្ធ័គ្រប់គ្រងសុវត្ថិភាពម្ហូបអាហារនៅក្នុងប្រទេសកម្ពុជាយើង។
លោក ទឹម រិទ្ធី បានបញ្ជាក់ថា មូលហេតុដែលជ្រើសយកក្រុមហ៊ុនលាង ទ្បេង ដើម្បីធ្វើទស្សនកិច្ចសិក្សានេះ ដោយសារក្រុមហ៊ុនទឹកត្រីលាង ទ្បេង ទទួលបានវិញ្ញាបនបត្រ័អនុវត្តដោយជោគជយ័អំពីប្រពន្ធ័គ្រប់គ្រងសុវត្ថិភាពម្ហូបអាហាររួចរាល់ហើយ ដូច្នេះវាត្រូវនឹងមេរៀនរបស់ពួកយើងក្នុងការដកស្រង់បទពិសោធជាក់ស្តែង និងសរសេររបាយការណ៍។
លោក បន្តថា នេះជាក្រុមហ៊ុនទី៤ហើយ ដែលសិក្ខាកាមយើងបានចុះទស្សនកិច្ចសិក្សា ហើយបន្ទាប់ពីការចុះទស្សនកិច្ចសិក្សាទាំង៤ក្រុមហ៊ុននេះ គឺបានផ្តល់អត្ថប្រយោជន៍យ៉ាងច្រើនដល់សិក្ខាកាមរបស់យើង ព្រោះយើងមិនគ្រាន់តែរៀនទ្រឹស្តីក្នុងសាលានោះទេ តែយើងបានមកពិនិត្យការអនុវត្តជាក់ស្តែងថែមទៀត។
លោក ទឹម រិទ្ធី បានបញ្ជាក់ថា លោកធ្លាប់មកទីនេះយូរឆ្នាំដែរហើយ ប៉ុន្តែការចុះមកលើកនេះលោកពិនិត្យឃើញថា ក្រុមហ៊ុនលាង ទ្បេង មានការប្រែប្រួលឬវិវ៎ត្តន៍ច្រើនមែនទែន សំខាន់បរិមាណ និងគុណភាពផលិតផល។ ជាពិសេសជាងនេះទៀតក្រុមហ៊ុនបានកែច្នៃ និងរចនាកាន់តែមានស្តង់ដាខ្ពស់ទៅៗ ខណដែលផលិតផលរបស់ក្រុមហ៊ុនបានដាក់លក់នៅតាមទីផ្សារ សំខាន់ទីផ្សារទំនើបៗនិងទទួលបានការគាំទ្រយ៉ាងខ្លាំង។
យ៉ាងណាក៏ដោយលោកថា ជោគជយ័របស់ក្រុមហ៊ុនលាង ទ្បេង ក៏មិនអាចកាត់ផ្តាច់បានពីការជួយផ្តល់យោបល់ និងណែនាំចង្អុលបង្ហាញពីក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុរត្តន៍។
តាមការឲ្យដឹងរបស់លោក ទឹម រីទ្ធី ផលិតផលរបស់ក្រុមហ៊ុន លាង ទ្បេង បាននិងកំពុងត្រៀមនាំចេញទៅលក់នៅក្រៅប្រទេស ខណដែលក្រុមហ៊ុងក៏កំពុងត្រៀមយកស្តង់ដាមួយចំនួនទៀតគឺ BCS BRC ជាដើម ដើម្បីបង្កើនគុណភាពផលិតផលទឹកត្រីសម្រាប់ការនាំចេញ។ លោកថាគម្រោងរបស់ក្រុមហ៊ុន ការនាំចេញដំបូងនោះគឺនាំចេញទៅកាន់ទីផ្សារអ៊ឺរ៉ុប ។ ដូច្នេះអាចនិយយាថា នោះជាមោទកភាពមែនទែនសម្រាប់ប្រទេសកម្ពុជា ដែលមានផលិតផលលក់នៅទីផ្សារអ៊ឺរ៉ុប។
លោកប្រធាននាយកដ្ឋានបានអំពាវនាវជាថ្មីទៀត ដល់បងប្អូនប្រជាពលរដ្ឋខ្មែរឲ្យជួយគាំទ្រ និងប្រើប្រាស់ផលិតផលដែលជាស្នាដៃកូនខ្មែរ ហើយផលិតផលខ្មែរយើងឥទ្បូវនេះមានគុណភាពស្តង់ដាខ្ពស់មិនចាញ់ផលិតផលបរទេសនោះទ្បើយ។ អ្វីដែលសំខាន់ជាងនេះ ផលិតផលខ្មែរមានតម្លៃទាបជាងផលិតផលនាំចូលពីក្រៅប្រទេសផងដែរ ដែលអាចជួយបងប្អូនប្រជាពលរដ្ឋបានសន្សុំសំចៃប្រាក់កាសថែមទៀត។
លោកលាង ឡេងប្រធានសហគ្រាសលាង ទ្បេង បានឲ្យដឹងថា សហគ្រាសមួយនេះចាប់ផ្តើមដំណើរការនៅឆ្នាំ២០១១ ហើយផលិតផលរបស់សហគ្រាសរួមមាន ទឹកត្រី ទឹកស៊ីអ៊ីវ ទឹកខ្មេះ ទឹកម្ទេស ទឹកសៀង និងប្រេងខ្យង។ លោកបញ្ជាក់ថា ទោះបីផលិតផលទាំងនោះមិនទាន់ត្រូវបាននាំចេញទៅលក់នៅក្រៅប្រទេស ប៉ុន្តែសហគ្រាសបាននិងកំពង់ចរចារជាមួយដៃគូដើម្បីធ្វើការនាំចេញទៅលក់នៅសហរដ្ឋអាមេរិកនិងកូរ៉េ ក្នុងពេលឆាប់ៗនេះ ហើយលោករំពឹងថា ផលិតផលសហគ្រាសរបស់លោកនឹងទទួលបានការគាំទ្រនៅក្រៅប្រទេសមិនខាន។
លោកបន្តថា សហគ្រាសលាង ទ្បេង ប្រើប្រាស់វត្ថុធាតុដើមក្នុងស្រុកភាគច្រើន រួមទាំងអ្នកជំនាញនិងកម្លាំងពលកម្មក្នុងស្រុក។ ចំពោះផលិតផលដែលបានផលិតចេញពីសហគ្រាសគឺមានស្តង់ដាអនាមយ័ខ្ពស់មិនចាញ់ផលិតផលនាំចូលនោះទ្បើយ ហើយផលិតផលសហគ្រាសក៏ទទួលបានការទទួលស្គាល់ស្តង់ដា ISO របស់ប្រទេសអង់គ្លេសផងដែរ។
លោកលាង ឡេងប្រធានសហគ្រាសលាង ទ្បេង បានអំពាវនាវដល់ប្រជាពលរដ្ឋខ្មែរងាកមកគាំទ្រផលិតផលក្នុងស្រុក ព្រោះថាសព្វថ្ងៃនេះផលិតផលក្នុងស្រុកខ្មែរយើង ទាំងស្តង់ដាអនាមយ័ ទាំងរសជាតិមិនចាញ់ផលិតផលនាំចូលនោះទ្បើយ។
លោកបន្ថែមថា ការងាកមកគាំទ្រផលិតផលក្នុងស្រុក មិនគ្រាន់តែលើកទឹកចិត្តដល់ម្ចាស់សហគ្រាសក្នុងស្រុកប៉ុណ្ណោះទេ តែជាការបង្ហាញនូវការរួមចំណែកលើកកម្ពស់ផលិតផលខ្មែរ លើកកម្ពស់ជីវភាពរសនៅរបស់ប្រជាពលរដ្ឋខ្មែរយើងថែមទៀត៕