សម្ដេចតេជោ ហ៊ុន សែន អំពាវនាវដល់ព្រះសង្ឈ និងប្រជាពលរដ្ឋក្រោកឈរប្រឆាំងជនក្បត់ជាតិ ដែលប្រមាថព្រះមហាក្សត្រ
សារព័ត៌មាន Cambodia Nws/
ភ្នំពេញ ៖ ថ្លែងក្នុងឱកាស អញ្ជើញផ្តល់ស្រូវពូជ និងស្បៀងអាហារ ជូនកសិករជាង៥ពាន់គ្រួសារ នៅខេត្តពោធិ៍សាត នៅព្រឹកថ្ងៃទី២៥ ខែតុលា ឆ្នាំ២០២២នេះ សម្ដេចតេជោ ហ៊ុន សែន បានប្រកាស អំពាវនាវដល់ព្រះសង្ឈ និងប្រជាពលរដ្ឋក្រោកឈរប្រឆាំងជនក្បត់ជាតិ ដែលប្រមាថព្រះមហាក្សត្រ។
សម្តេចតេជោ ហ៊ុន សែន បានប្រកាសដូច្នេះថា ៖ «២ថ្ងៃមុននេះ គេមិនត្រឹមតែជេរខ្ញុំទេ គេជេរទាំងព្រះមហាក្សត្រ ដូច្នខ្ញុំអំពាវនាវចំពោះប្រជាពលដ្ឋទាំងអស់ ទាំងព្រះសង្ឃ ទាំងគ្រហស្ថ ដើម្បីប្រឆាំងជនក្បត់ជាតិ ហើយទាំងបក្សណាដែលផ្សាភ្ជាប់ជាមួយជនក្បត់ជាតិនេះ ដើម្បីធានាការពាររាជានិយម ការពាររាជបល្ល័ង្គ ការពារព្រះមហាក្សត្រ ការពារឯកភាពសន្តិភាព នៃទឹកដីរបស់យើង»។
កាលពីពេលថ្មីៗនេះ ក្នុងវេទិកាសាធារណៈមួយនៅក្រៅប្រទេស ទណ្ឌិត សម រង្ស៉ី បានបន្តជេរប្រមាថយ៉ាងធ្ងន់ធ្ងរបំផុតលើ ព្រះករុណា ព្រះបាទសម្តេចព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយចោទប្រកាន់ព្រះអង្គថាជា «ជនក្បត់ជាតិ»។
ទណ្ឌិត សម រង្ស៉ី បាននិយាយប្រមាថយ៉ាងដូច្នេះថា «ស្តេចសព្វថ្ងៃនេះ អត់មានមនសិការជាតិតែបន្តិចក៏អត់ដែរ បន្ទាប់ពី ហ៊ុន សែន ស្តេចស្រុកខ្មែរក្បត់ជាតិ ព្រោះយើងបំពេញបន្ថែមឱ្យគេ ក្បត់ជាតិពេញទីហើយ ព្រោះយើងកាត់ទឹកដីខ្មែរឱ្យបរទេស»។
គួរបញ្ជាក់ថា ព្រះមហាក្សត្រកម្ពុជាគឺជាព្រះប្រមុខរដ្ឋនៃព្រះរាជាណាចក្រកម្ពុជា ទ្រង់គ្រងរាជ្យសម្បត្តិ ប៉ុន្តែទ្រង់មិនកាន់អំណាចឡើយ ព្រះមហាក្សត្រ ទ្រង់ជាព្រះប្រមុខរដ្ឋមួយជីវិត អង្គព្រះមហាក្សត្រ មិនអាចនរណារំលោភបំពានបានឡើយ ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និង និរន្តរ៍ភាពជាតិ។
ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដី នៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និង ការគោរពសន្ធិសញ្ញាអន្តរជាតិ។ ព្រះមហាក្សត្រ ទ្រង់មានតួនាទីខ្ពង់ខ្ពស់ជាអាជ្ញាកណ្ដាល ដើម្បីធានាការប្រព្រឹត្តទៅនៃអំណាចសាធារណៈឲ្យមានភាពទៀងទាត់ ៕
