តំណែងនាយករដ្ឋមន្រ្តីរបស់លោក ប្រាយុទ្ធ ចាន់អូចា នឹងសម្រេចនៅចុងខែនេះ

សារព័ត៌មាន​ Cambodia News/

ថៃ ៖ តុលាការធម្មនុញ្ញថៃ បានកំណត់យកថ្ងៃទី៣០ ខែកញ្ញា ធ្វើជាកាលបរិច្ឆេទសម្រាប់ប្រកាស សេចក្តីសម្រេច​ជុំវិញ​អាណត្តិកាន់​អំណាច​របស់លោក ប្រាយុទ្ធ ចាន់អូចា ខណៈតំណែងនាយករដ្ឋមន្រ្តីរបស់លោក កំពុងស្ថិតក្រោមការព្យួរជាបណ្តោះអាសន្ន។

តុលាការធម្មនុញ្ញថៃកំពុងតែពិចារណាលើ សំណុំរឿងដែលស្នើឡើងដោយ គណបក្សប្រឆាំង ភឿថៃ (Pheu Thai) ដែល​បាន​អះ​អាង​ថា អាណត្តិនាយករដ្ឋមន្រ្តីរបស់លោក ប្រាយុទ្ធ គឺគួរតែបានផុតកំណត់តាំងតែពីខែសីហាកន្លងទៅម្ល៉េះ។

លោក ប្រាយុទ្ធ ចាន់អូចា វ័យ៦៨ឆ្នាំ បាននិយាយថា រូបលោកនឹងគោរពតាមការសម្រេចរបស់តុលាការធម្មនុញ្ញ ខណៈឧបនាយក​រដ្ឋ​មន្រ្តី លោក ប្រាវីត វ៉ុងស៊ូវ៉ាន់ (Prawit Wongsuwan) កំពុងកាន់តំណែងជា នាយករដ្ឋមន្រ្តីបណ្តោះអាសន្ន។

ស្របពេលដែលតំណែងជា ប្រមុខរដ្ឋាភិបាលត្រូវបានព្យួរ លោក ប្រាយុទ្ធ កំពុងនៅបន្តកាន់តួនាទីជា រដ្ឋមន្រ្តីការពារជាតិ ហើយ​អាច​នឹង​ត្រឡប់មកជា នាយករដ្ឋមន្រ្តីដូចដើមវិញ ប្រសិនបើតុលាការសម្រេចថា អាណត្តិលោកមិនទាន់ដល់៨ឆ្នាំ ដែល​ត្រូវ​បាន​កំណត់​នៅ​ឡើយទេ៕