សម្ដេចតេជោ ហ៊ុន សែន ៖ មន្ទីរពេទ្យហ្លួងម៉ែ នឹងប្រែជាមន្ទីរពេទ្យឯកទេសព្យាបាលជំងឺមហារីក
សារព័ត៌មាន Cambodia News/
ថ្ងៃចេញផ្សាយៈ April 28, 2022
ភ្នំពេញ ៖ ថ្លែងនៅក្នុងពិធីសំណេះសំណាល ជាមួយកីឡាករ កីឡាការិនី និងអត្តពលិក មុនពេលពួកគេចេញទៅប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាម នៅព្រឹក ថ្ងៃទី២៨ ខែមេសានេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា មន្ទីរពេទ្យហ្លួងម៉ែ អាចរៀបចំជាមន្ទីរពេទ្យឯកទេស ព្យាបាលជំងឺមហារីក ព្រោះបច្ចុប្បន្នជំងឺមហារីកកើតមានច្រើន។
ស្របពេលបច្ចុប្បន្នចំនួនអ្នកជំងឺកូវីដ-១៩ កំពុងធ្នាក់ចុះ ខណៈនៅភ្នំពេញនៅសល់តែ ២៦ នាក់ សម្ដេចបានផ្ដល់អនុសាសន៍ ផ្ទេរអ្នកជំងឺនៅស្តាតនៅពេទ្យហ្លួងម៉ែ ឬមន្ទីរពេទ្យចាក់អង្រែ ដើម្បីយកស្តាតទៅជួលជុល និងផ្ដល់ឱ្យកីឡាករហ្វឹកហាត់ ត្រៀមខ្លួនក្នុងនាមកម្ពុជាជាម្ចាស់ផ្ទះប្រកួតកីឡាស៊ីហ្គេម (SEA Game) លើកទី៣២ នៅខែឧសភា ឆ្នាំ២០២៣។
ជាមួយគ្នានេះ សម្ដេចតេជោ ប្រកាសថា កម្ពុជាកំពុងសាងសង់មន្ទីរពេទ្យសម្រាប់ព្យាបាលជំងឺកូវីដ-១៩ ក៏ដូចជាជំងឺឆ្លង មានទាំងបន្ទប់សម្ភព និងវះកាត់ជាដើម ដែលមន្ទីរពេទ្យនេះអាចទទួលអ្នកជំងឺជាង ១ ម៉ឺននាក់ នឹងបញ្ចប់ការសាងសង់នៅឆ្នាំក្រោយ។
គួរបញ្ជាក់ថា មន្ទីរពេទ្យស្ត្រីនគរទេព និងត្រូវប្តូរឈ្មោះទៅជាមន្ទីរពេទ្យហ្លួងម៉ែ ដើម្បីថ្វាយព្រះមរមរាជកិត្តិយសចំពោះព្រះរាជកិច្ចដឹកនាំប្រកបដោយទសពិធរាជធម៌ តាមព្រះរាជលំងានព្រះមហាវីរក្សត្រ ព្រះវររាជបិតាឯករាជ្យជាតិខ្មែរ ព្រះមរមកោដ្ឋជាទីសក្ការៈដ៏ខ្ពង់ខ្ពស់។ ដោយឡែក ស្របតាមស្ថានភាពបច្ចុប្បន្ន មន្ទីរពេទ្យ ហ្លួងម៉ែ កំពុងព្យាបាលអ្នកជំងឺកូវីដ-១៩៕
