អធិការស្រុកល្វាឯមចុះហ៊ុំព័ទ្ធផ្ទះពលរដ្ឋ ៣០០គ្រួសារ នៅភូមិវាលធំ ក្រោយរកឃើញអ្នកឆ្លងជំងឺកូវីដ-១៩ ថ្មី៩នាក់
សារព័ត៌មាន Cambodia News/
ភ្នំពេញ ១០ មីនា ២០២១) ៖ នៅព្រឹកថ្ងៃទី១០ ខែមីនា ឆ្នាំ២០២១នេះ អាជ្ញាធរខេត្តបានប្រកាសថា បានរកឃើញអ្នកឆ្លងជំងឺកូវីដ-១៩ ថ្មី ចំនួន៩នាក់ ដែលរស់នៅស្រុកល្វាឯម ឃុំពាមឧកញ៉ាអុង ខេត្តកណ្តាល ពាក់ព័ន្ធព្រឹត្តិការណ៍សហគមន៍ ២០កុម្ភៈ ។
ក្រោយរកឃើញអ្នកឆ្លងជំងឺកូវីដ-១៩ ថ្មី ចំនួន៩នាក់ នេះអធិការនគរបាលស្រុកល្វាឯមបានចុះបិទភូមិវាលធំ ឃុំពាមឧកញ៉ាអុង ជាបណ្តោះអាសន្ន និងចុះហ៊ុំព័ទ្ធផ្ទះប្រជាពលរដ្ឋ ៣០០ គ្រួសារ ដែលផ្ទុះកូវីដ ១៩ មិនឲ្យចេញក្រៅ ដើម្បីគ្រូពេទ្យយកសំណាកទៅពិនិត្យ។
គួរបញ្ជាក់ថា នៅយប់ថ្ងៃទី៩ ខែមីនា ម្សិលមិញ លោក គង់ សោភ័ណ្ឌ អភិបាលខេត្តកណ្តាល បានដឹកនាំក្រុមការងារជំនាញពាក់ព័ន្ធ ត្រួតពិនិត្យ ករណីនេះ ក្រោយលទ្ធផលតេស្តសំណាក ចេញដោយវិទ្យាស្ថាន ប៉ាស្ទ័រកម្ពុជា មានវិជ្ជមានជំងឺកូវីដ-១៩។
ហើយអ្នកជំងឺកូវីដ-១៩ ទាំង៩នាក់ ត្រូវបានក្រុមគ្រូពេទ្យ នាំយកមកសម្រាកព្យាបាលនៅ មន្ទីរពេទ្យបង្អែកជ័យជំនះ ក្រុងតាខ្មៅ ភ្លាមៗរួចហើយ៕ ដោយ ៖ ហេង នាង
