អគ្គីភ័យឆាបឆេះកន្លែងធ្វើម្ហូបក្នុងសណ្ឋាគារ ញូវ យ៉ក
ភ្នំពេញ ៖ កាលពីវេលាម៉ោង ២៤ និង ០០ នាទីយប់ថ្ងៃទី ១៧ ខែកុម្ភៈ គ្រោះអគ្គីភ័យមួយបានកើតឡើងយ៉ាងសន្ធោសន្ធៅនៅក្នុង សណ្ឋាគារញូវយ៉ក ជាន់ទី៨ ដែលមានទីតាំងនៅតាមបណ្តោយផ្លូវព្រះមុនីវង្ស សង្កាត់បឹងរាំង ខណ្ឌដូនពេញ ។
ចំពោះហេតុការណ៍អគ្គីភ័យនេះសមត្ថកិច្ចមិនទាន់ដឹងច្បាស់ថាបង្កឡើង ដោយសារមូលហេតុអ្វី ទេ ប៉ុន្តែជាជំហានដំបូងនោះសមត្ថកិច្ចសន្និដ្ឋានថា បង្កឡើងដោយសារផ្ទុះសេខ្សែភ្លើង ។ ទាក់ទិននឹង គ្រោះថ្នាក់អគ្គីភ័យនេះសមត្ថកិច្ចមូលដ្ឋាននិងបងប្អូនប្រជាពលរដ្ឋបាន សហការជាមួយនិងកងកម្លាំងពន្លត់ និងបង្កអគ្គីភ័យនៃស្នងការដ្ឋាននគរបាលរាជធានីភ្នំពេញ អន្តរាគមន៍យ៉ាងស្វែងស្វាយធ្វើឲ្យអណ្តាតភ្លើងមិនបង្កឲ្យរាលដាលធំដុំ។
សមត្ថកិច្ចបានប្រើប្រាស់រថយន្តពន្លត់អគ្គីភ័យអស់ចំនួន ប្រាំគ្រឿងហើយ ។ ជំហានដំបូងការខូចខាតសមត្ថកិច្ចបានបញ្ចាក់ថា កន្លែងចុងភៅធ្វើម្ហូបក្នុងសណ្ឋាគារ នឹងបន្ទប់មួយ ទៀតត្រូវអគ្គីភ័យឆាបឆេះទាំងស្រុងតែម្តង៕ ហេង នាង
