ផ្ទុះជំងឺឈីកគន់ហ្គន់យ៉ា នៅក្រុងប៉ោយប៉ែត
សារព័ត៌មាន Cambodia News/
ប៉ោយប៉ែត (២៤ កក្កដា ២០២០) ៖ ក្រសួងសុខាភិបាលកម្ពុជា បានចេញសេចក្តីប្រកាសព័ត៌មាន ស្តីពីការផ្ទុះឡើងនៃជំងឺឈីកគន់ហ្គន់យ៉ា (Chikunngunya) នៅខេត្តបន្ទាយមានជ័យ កាលពីថ្ងៃទី២៣ ខែកក្កដា ឆ្នាំ២០២០។
ក្រសួងសុខាភិបាល បានប្រកាសថា កាលពីពេលថ្មីៗនេះ មានការកើតចេញនូវជំងឺឈីកគន់ហ្គន់យ៉ា (Chikunngunya) ដែលហៅកាត់ថា ឈីក (CHIK) នៅក្នុងភូមិមួយចំនួននៃសង្កាត់ប៉ោយប៉ែត ខេត្តបន្ទាយមានជ័យ។
ចាប់តាំងពីថ្ងៃទី១៩ ខែកក្កដា ឆ្នាំ២០២០ រហូតដល់ថ្ងៃទី២២ ខែកក្កដា ឆ្នាំ២០២០ ប្រជាពលរដ្ឋនៅភូមិក្បាលកោះ ភូមិអូរជ្រៅ ភូមិប៉ោយប៉ែត ភូមិព្រៃគប់ ភូមិអូរនាង និងភូមិអូរឫស្សី នៃសង្កាត់ប៉ោយប៉ែត ខេត្តបន្ទាយមានជ័យ មានចេញរោគសញ្ញា គ្រុនក្តៅ ៣៨អង្សាសេ កន្ទូល ក្រហមលើស្បែក និងឈឺសន្លាក់ដៃជើង។
ជំងឺគ្រុនឈឺក (CHIK) គឺជាជំងឺបង្កឡើងដោយវីរុសឈឺក ហើយចម្លងតាមរយៈមូសខ្លាញីខាំ ជាពិសេស ខាំនៅពេលថ្ងៃ។ ភ្នាក់ងារចម្លង គឺសត្វមូសប្រភេទក្រុមអាអេដេស (Aedes Aegypti and Aedes Abopictus) ដែលជាភ្នាក់ងារចម្លងជំងឺគ្រុនឈាមផងដែរ។ រោគសញ្ញារួមមាន៖ គ្រុនក្ដៅស្រួចស្រាវលើសពី ៣៨អង្សារសេ ឈឺសន្លាក់ ឈឺសាច់ដុំ ឈឺក្បាល ប្អូតចង្អោរ អស់កម្លាំង មានស្នាមកន្ទួលក្រហមលើខ្លួន និងកន្តួលក្រហមលើ ស្បែកដៃ។
ជាទូទៅ ជំងឺគ្រុនឈឺក មិនបណ្ដាលឱ្យអ្នកជំងឺស្លាប់បាត់បង់ជីវិតទេ ស្ទើរតែគ្រប់អ្នកជំងឺទាំងអស់បាន ជាសះស្បើយឡើងវិញក្នុងរយៈពេលក្នុងមួយសប្តាហ៍ ឬអាចមានរយៈពេលយូរដល់រាប់អាទិត្យក្នុងករណីខ្លះៗដែរ ជាពិសេសជំងឺនេះ អាចធ្វើឱ្យអ្នកជំងឺមានអាការៈឈឺសន្លាក់ដៃជើងក្នុងរយៈពេលយូរ (ដល់ឆ្នាំ) ក៏មានដែរ។
ជំងឺនេះ អាចបណ្ដាលឱ្យស្លាប់បាត់បង់ជីវិតបាន នៅក្នុងករណីដែលអ្នកជំងឺកើតមានជំងឺនេះរួមផ្សំគ្នាជាមួយជំងឺ ផ្សេងៗ ដូចជាជំងឺគ្រុនចាញ់ ជំងឺគ្រុនឈាម ជំងឺរលាកស្រោមខួរជាដើម ព្រោះជំងឺរួមផ្សំទាំងនេះអាចបណ្ដាលឱ្យ អ្នកជំងឺស្លាប់បាន។
ទោះបីជាជំងឺគ្រុនឈីក មានហានិភ័យបណ្ដាលឱ្យស្លាប់ក្នុងកម្រិតទាបក៏ពិតមែន តែវានាំឱ្យ ប៉ះពាល់សុខភាព ខាតបង់ពេលវេលារៀនសូត្រ ពេលវេលាធ្វើការរកស៊ីទទួលទានចិញ្ចឹមជីវិតប្រចាំថ្ងៃ ជាពិសេស អ្នកមានវ័យចំណាស់ចាប់ពីអាយុ៥០ឆ្នាំឡើង ពួកគាត់អាចឈឺសន្លាក់ឆ្អឹងយូរ ដែលប៉ះពាល់ដល់សុខភាពបុគ្គល សេដ្ឋកិច្ចគ្រួសារ និងសង្គមផងដែរ៕
