កម្ពុជាចង់ឲ្យអាស៊ានក្លាយជាសមាគមនាំអង្ករចេញដ៏ធំក្នុងពិភពលោក
នៅក្នុងកិច្ចប្រជុំអាស៊ានលើកទី២០ ក្នុងឆ្នាំ២០១២ខាងតមុខនេះ នាយករដ្ឋមន្ត្រីកម្ពុជា បានបង្ហាញពីគំនិតផ្តួចផ្តើមរបស់ខ្លួនក្នុងការធ្វើឲ្យបណ្តាប្រទេសអាស៊ានបង្កើតសមាគមប្រទេសអ្នកនាំអង្ករចេញទៅកាន់ទីផ្សារពិភពលោក។
ក្នុងជំនួបសម្តែងការគួរសមរវាងលោកប្រធានាធិបតីមីយ៉ាន់ម៉ាកាលពីល្ងាច ថ្ងៃទី២១ មីនា ២០១២ លោក ហ៊ុន សែន បានស្នើឲ្យប្រទេសមីយ៉ាន់ម៉ា ជួយជំរុញ និងជួយសម្រេចបំណងរបស់កម្ពុជាក្នុងការធ្វើឲ្យអាស៊ានបង្កើតឲ្យបាននូវសមាគមអ្នកនាំអង្ករចេញ។
លោក ហ៊ុន សែនបានប្រាប់លោកប្រធានាធិបតីមីយ៉ាន់ម៉ាថា ប្រទេសនៅក្នុងសមាគមអាស៊ាន គឺមួយក្រុមជាប្រទេសដែលនាំអង្ករចេញ និងសមាជិកអាស៊ានមួយក្រុមទៀត គឺជាអ្នកនាំអង្ករចូល។ ដូច្នេះការបង្កើតសហការគ្នានេះជាការល្អសម្រាប់យើង អាចសម្របសម្រួលសម្រាប់ការងារនេះ។
លោក ខៀវ កាញារីទ្ធ អ្នកនាំពាក្យរាជរដ្ឋាភិបាល និងជារដ្ឋមន្ត្រីក្រសួងព័ត៌មានបាននិយាយថា លោកប្រធានាធិបតីម៉យ៉ាន់ម៉ាបានគំាទ្រនូវគំនិត របស់នាយករដ្ឋមន្រ្តីខ្មែរ ក្នុងការបង្កើតសមាគមប្រទេសអ្នកនាំអង្ករចេញ ហើយមីយ៉ាន់ម៉ា នឹងប្រឹងប្រែងពង្រឹងនូវសមត្ថភាពនៃម៉ាស៊ីនកិនស្រូវនៅក្នុងប្រទេសរបស់ខ្លួនដើម្បីចួលរួមក្នុងការងារនេះ។
គួរបញ្ជាក់ថា នៅឆ្នាំ២០០៨ ប្រទេសកម្ពុជាក្រោមការផ្តួមផ្តើមគំនិតរបស់លោក ហ៊ុន សែន បានស្នើឲ្យប្រទេស ដែលជាសមាជិកអាស៊ានទាំង១០ រួមគ្នាបង្កើតសមាគមប្រទេស នាំចេញអង្ករមួយដើម្បីធ្វើឲ្យអាស៊ានកា្លយជាប្រទេស ដែលនាំចេញអង្ករធំជាងគេ នៅលើពិភពលោក៕
