បន្ទាប់ពីរកឃើញករណីឆ្លងកូវីដ១៩ ចំនួន៣១នាក់យប់មិញខេត្តព្រះសីហនុឈរលេខ១
សារព័ត៌មាន Cambodia News/
ព្រះសីហនុ (២៣ មីនា ២០២០) ៖ ខេត្តព្រះសីហនុ ត្រូវបានរកឃើញករណីឆ្លងកូវីដ១៩ ចំនួន៣៤នាក់ហើយ ក្នុងនោះ ៣១នាក់ត្រូវបានរកឃើញកាលពីយប់ថ្ងៃទី២២ ខែមីនា ឆ្នាំ២០២០ ដែលនេះគឺជាចំនួនច្រើនជាងគេ ក្នុងចំណោមរាជធានីខេត្តនៅកម្ពុជា ដែលរកឃើញជំងឺនេះ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។
បន្ទាប់មកគឺរាជធានីភ្នំពេញដែលមានអ្នកឆ្លងកូវីដ១៩ ចំនួន១១នាក់, ខេត្តកំពង់ចាម១០នាក់ និងបាត់ដំបង៨នាក់។ ក្រៅពីនោះរួមមានខេត្តកែប ត្បូងឃ្មុំ កំពង់ឆ្នាំង សៀមរាប កំពត បន្ទាយមានជ័យ ព្រះវិហារ កោះកុង និងកណ្តាល។
សូមជម្រាបថា គិតត្រឹមយប់មិញ ថ្ងៃទី២២មីនា ក្រសួងបានរកឃើញករណីវិជ្ជមានវីរុសកូវីដ១៩ សរុបទាំងអស់មានចំនួន៨៤នាក់ (ស្រី២១នាក់ ប្រុស៦៣នាក់) ដែលក្នុងនោះរួមមាន ៖ ជនជាតិចិន១នាក់ (ខេត្តព្រះសីហនុបានជាសះស្បើយ) ,អង់គ្លេស៣នាក់ (១នាក់ជាសះស្បើយ) កាណាដា១នាក់, បែលហ្សិក១នាក់ បារាំង៣៣នាក់, ម៉ាឡេស៊ី១២នាក់ និងខ្មែរ៣៣នាក់៕
