លោក ហ៊ុន សែន ប្រកាសចាត់វិធានការតាមផ្លូវច្បាប់ ដល់អ្នកចោទរដ្ឋាភិបាលថា ប្រើប្រាស់ផែនទីក្លែងក្លាយ
សារព័ត៌មាន Cambodia News/
ភ្នំពេញ (០៩ កញ្ញា ២០១៥) ៖ ថ្លែងនៅក្នុងសេចក្តីថ្លែងការណ៍ពិសេស ស្តីពី បញ្ហាផែនទីព្រំដែនរវាងកម្ពុជា នឹង វៀតណាម នៅលើកកញ្ចក់ទូរទស្សន៍ជាតិកម្ពុជានៅរសៀលថ្ងៃទី៨ កញ្ញា លោកនាយករដ្ឋមន្ត្រី ហ៊ុន សែន បានប្រកាសចាត់វិធានការតាមផ្លូវច្បាប់ ដោយគ្មានការលើកលែងលើជនណា ដែលបន្តប្រើពាក្យថា រាជរដ្ឋាភិបាលកម្ពុជា ប្រើប្រាស់ផែនទីក្លែងក្លាយ ផែនទីចោរ។
លោក ហ៊ុន សែន ក៏បានប្រកាសតំាងចិត្តទុកជាមុនថា នឹងលាលែងពីតំណែងនាយករដ្ឋមន្រ្តីនិងសុខចិត្តទទួលទោស ប្រសិនបើផែនទីដែលគូសដោយក្រុមភូមិសាស្រ្ត ផែនទីដែលខ្ចីពីបារំាងនិងផែនទីរបស់រាជរដ្ឋាភិបាល ផ្ទៀងផ្ទាត់ទៅឃើញថាខុសគ្នានោះ។
លោកហ៊ុន សែន បានបន្តថា ក្នុងករណីដែល ផែនទីប្រទេសកម្ពុជា យកមកពីប្រទេសបារាំងដូចគ្នា ទៅនឹងផែនទីដែលចុះហត្ថលេខាដោយប្រទេសវៀតណាម តើនរណា ជាអ្នកទទួលខុសត្រូវ។
ជាមួយគ្នានោះ លោក ហ៊ុន សែន ក៏បានប្រកាសបញ្ជាក់ផងដែរថា រាជរដ្ឋាភិបាល ក៏នឹងចាត់វិធានការ ដោយគ្មានការលើកលែង លើអ្នកបំពានច្បាប់ប្រឆាំងអ្នកនយោបាយ ដោយគ្មានការលើកលែង លើអ្នកណាក៏ដោយ ដែលបំពានច្បាប់ ក្រោមពាក្យថា ប្រើប្រាស់សិទ្ធិបញ្ចេញមតិ ឬក៏សិទ្ធិនយោបាយ៕
