សម្តេចតេជោ ៖ មន្ត្រីនៅទូទាំងប្រទេសត្រូវបម្រើប្រជាជនដោយស្មោះត្រង់បំផុត
សារព័ត៌មាន Cambodia News/
ភ្នំពេញ (២៥ កុម្ភៈ ២០២០) ៖ ក្នុងពិធីប្រគល់សញ្ញាប័ត្រ និងវិញ្ញាបនបត្រ ដល់សិស្ស មន្ត្រី និងកម្មសិក្សាការី របស់សាលាភូមិន្ទរដ្ឋ បាល នៅព្រឹកថ្ងៃទី២៥ ខែកុម្ភៈ នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានរំលឹកដាស់តឿន ណែនាំមន្ត្រី ទាំងអស់ នៅទូទាំងប្រទេស ត្រូវដាក់ផលប្រយោជន៍ របស់ប្រជាជនធ្វើជាស្នូល ពោលត្រូវធ្វើជាខ្ញុំបម្រើ របស់ប្រជាជនដោយស្មោះត្រង់បំផុត ។
សម្ដេចតេជោ ហ៊ុន សែន បានណែនាំថា ដំបូង មន្ត្រីត្រូវរៀបចំផែនការឱ្យបានហ្មត់ចត់ ជាក់លាក់ ចាត់តាំងអនុវត្តន៍ និងត្រូវចេះត្រៀមដោះស្រាយ នូវកត្តាចៃដន្យ ដែលវានឹងអាចកើតមានឡើង យ៉ាងណាមិញ ដូចជាបច្ចុប្បន្ន ដែលកំពុងរងផលប៉ះពាល់ ដោយសារមេរោគ COVID-19 ជាដើម។
សម្ដេច បានបញ្ជាក់ទៀតថា ពេលកត្តាចៃដន្យកើតឡើង វានឹងលេចចេញនូវមនុស្សពីរប្រភេទ គឺ ប្រភេទអ្នកចាំតែរាយការណ៍យកល្អទៅថ្នាក់លើ និងស្ដីបន្ទោសថ្នាក់ក្រោម។ ទី២ គឺជាប្រភេទ ដែលគិតគូរ តែពីការខិតខំធ្វើការ រួចហើយទើបរាយការណ៍ជូនថ្នាក់លើ ជាពិសេសសម្ដេច បានផ្តាំផ្ញើទៅកាន់មន្ត្រីនៅ ទូទាំងប្រទេស ត្រូវប្រុងប្រយ័ត្នចំពោះការលូកលាន់ ពីប្រពន្ធ ឬ កូន ដែលអាងបុណ្យសក្តិឪពុក ទៅប្រព្រឹត្ត ទង្វើដែលសង្គមស្អប់ខ្ពើម៕
