សម្តេចតេជោ ៖ វៀតណាមមិនមែនជាចៅហ្វាយរបស់ខ្ញុំទេ
សារព័ត៌មាន Cambodia News/
ភ្នំពេញ (០១ សីហា ២០១៦) ៖ សម្តេចអគ្គមហាសេនាបតីតេជោ ហ៊ុន សែន បានសរសេរនៅលើបណ្តញទំនាក់ទំនងសង្គម (Facebook) Page ផ្លូវការរបស់សម្តេចដោយសង្កត់ធ្ងន់ថា«វៀតណាមមិនមែនជាចៅហ្វាយ របស់ខ្ញុំដែលខ្ញុំត្រូវស្មោះត្រង់នោះទេ»។
ខ្លឹមសារនៃសំណេររបស់សម្តេចតេជោនាយករដ្ឋមន្ត្រីខាងលើនេះ គឺសម្តេចឆ្លើយតបទៅនឹងអាក់ខោនមួយដែលដាក់ឈ្មោះថា Phạm Đức Hiển ដែល comment ចូលទៅ Page របស់សម្តេច ដោយសរសេរថា«លោកហ៊ុនសែនក្បត់វៀតណាម» ។
សម្តេចតេជោ ហ៊ុន សែន បានដាក់ជាសំណួរឆ្លើយតបធ្ងន់ៗទៅកាន់ម្ចាស់អាក់ខោនខាងលើទៀតថា «ហេតុអ្វីបានជាលោកនិយាយថាខ្ញុំក្បត់វៀតណាម? តើវៀតណាមជាឪពុកខ្ញុំឬ ជាមហាក្សត្រខ្ញុំឬ? លោកត្រូវដឹងថា អ្នកដែលខ្ញុំត្រូវស្មោះត្រង់ គឺជាតិខ្មែរបស់ខ្ញុំ ព្រះមហាក្សត្រកម្ពុជាជាទីសក្ការះរបស់ខ្ញុំ និង ភរិយាជាទីស្រឡាញ់របស់ខ្ញុំ»។
សម្តេចតេជោនាយករដ្ឋមន្ត្រីសង្កត់ធ្ងន់ទៀតថា«បើលោកជាជនជាតិ វៀតណាមរស់នៅកម្ពុជាស្របច្បាប់ ត្រូវគោរពច្បាប់កម្ពុជា បើរស់នៅមិនស្របច្បាប់ត្រូវចាកចេញពីកម្ពុជា និងបើរស់នៅវៀតណាមសុំស្រឡាញ់មេដឹកនាំវៀតណាមទៅ។ខ្ញុំជាមេដឹកនាំ កម្ពុជាដែលមានឯករាជ្យ អធិបតេយ្យភាព ដែលត្រូវទំនាក់ទំនងជាមួយមេដឹកនាំវៀតណាមដោយស្មើភាព និងស្មើសិទ្ឋិ។
សុំលោកបញ្ជូនសារនេះជូនមេដឹកនាំវៀតណាមផងបើលោកជានជាតិវៀតណាម ត្រឹមត្រូវមែន ព្រោះខ្ញុំស្គាល់ច្បាស់ចរិតមេដឹកនាំវៀតណាមតែងគោរពនូវឯករាជ្យ អធិបតេយ្យភាពរបស់កម្ពុជា ខុសពីអាម៉ីអាថោងដូចលោកនេះឯង» ៕
