ព័ត៌មានលម្អិតពីរបៀបទូទាត់ថ្លៃសំរាម ដើម្បីជៀសវាងរងការពិន័យ
សារព័ត៌មាន Cambodia News/
ភ្នំពេញ (១៩ ធ្នូ ២០១៩) ៖ ចាប់ពីថ្ងៃទី១ ខែមករា ឆ្នាំ២០២០ ថ្លៃសំរាមនឹងលែងមាននៅលើវិក្កយបត្រភ្លើងដូចសព្វដងទៀតហើយ សាលារាជធានីភ្នំពេញឲ្យដឹងថាអតិថិជនត្រូវបង់ថ្លៃសេវាប្រចាំខែចាប់ពីថ្ងៃទី១ ដល់ថ្ងៃទៅ១៥ នៃខែបន្ទាប់ មានន័យថាបើអតិថិជនបង់ថ្លៃសំរាមសំរាប់ខែមករា ត្រូវបង់ថ្លៃសេវាចន្លោះពីថ្ងៃទី១ ដល់ទី១៥ ខែកុម្ភៈ។
ប្រភពខាងលើបញ្ជាក់ទៀតថាក្នុងករណីអតិថិជនខកខានបង់ប្រាក់ក្រោយ១៥ថ្ងៃនៃដំណាច់ខែនីមួយៗនឹងត្រូវចាត់ទុកជាបំណុល ដែលជាកម្មវត្ថុនៃការពិន័យតាមច្បាប់។ អតិថិជនអាចបង់ប្រាក់បានតាមរយៈធនាគារអេស៊ីលីដា ភ្នាក់ផ្សេងៗទៀតដូចជា eMoney Lyhour Weiluy Pi Pay True Money និង Dara Pay ជាដើម។
ចំពោះអតិថិជនធ្លាប់បង់ថ្លៃសេវាប្រមូលសំរាមក្នុងវិក្កយបត្រអគ្គិសនី អតិថិជនត្រូវបង់ថ្លៃប្រមូលសំរាមដោយផ្អែកតាមថ្លៃសេវាដែលបានបង់កាលពីខែតុលា ឆ្នាំ២០១៩ ដោយគ្រាន់តែវាយបញ្ចូលលេខសម្គាល់អតិថិជន ឬID ដែលមានក្នុងវិក្កយបត្រនោះ។
ចំពោះអ្នកធ្លាប់បង់ផ្ទាល់ជាមួយក្រុមហ៊ុនស៊ីនទ្រី គឺមិនត្រូវបន្តបង់ជាមួយក្រុមហ៊ុនទៀតទេតែត្រូវបង់ជាមួយរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញវិញ តាមប្រព័ន្ធអេឡិចត្រូនិច ឬធានាគារ៕
