ការតែងតាំងថ្នាក់ដឹកនាំអង្គភាពមិនឱ្យមានការសូកប៉ាន់ដើម្បីផលប្រយោជន៍ផ្ទាល់ខ្លួន
សារព័ត៌មាន Cambodia News/
ព្រះសីហនុ (៩ សីហា ២០១៩) ៖ លោកឧត្តមសេនីយ៍ឯកហ៊ុន ម៉ាណែត មេបញ្ជាការកងទ័ពជើងគោកបានបញ្ជាក់ថា ឆន្ទៈ និងគោលការណ៍នៃការដឹកនាំរបស់ខ្ញុំ(មេបញ្ជាការកងទ័ពជើងគោក)គឺមិនឱ្យមានការសូកប៉ាន់ក្នុងការតែងតាំងថ្នាក់ដឹកនាំអង្គភាពដើម្បីផលប្រយោជន៍ផ្ទាល់ខ្លួន គឺជ្រើសរើសនាយទាហានដែលមានឆន្ទៈបម្រើជាតិតាមរយៈការវាយតម្លៃទៅលើសមត្ថភាព គុណធម៌ សីលធម៌ បទពិសោធន៍ សុខភាព។
ថ្លែងក្នុងពិធីប្រកាសតែងតាំងផ្លាស់ប្តូរមុខងារមេបញ្ជាការ តំបន់ប្រតិបត្តិការសឹករង ខេត្តព្រះសីហនុ នាថ្ងៃព្រហស្បតិ៍ ទី០៨ ខែសីហា ឆ្នាំ២០១៩ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បានបញ្ជាក់ថា ការជ្រើសរើសរើសថ្នាក់ដឹកនាំអង្គភាព(មេបញ្ជាការ នាយសេនាធិការ) បានត្រឹមត្រូវគឺជាកត្តាធានាបានសាមគ្គីភាព ឯកភាព និងប្រសិទ្ធភាពបានល្អ។
លោកឧត្តមសេនីយ៍ឯក ហ៊ុន ម៉ាណែត បន្តថា គោលការណ៍របស់កងទ័ពជើងគោក គឺការជ្រើសរើសថ្នាក់ដឹកនាំអង្គភាពចាប់ពីថ្នាក់តំបន់ប្រតិបត្តិការសឹករង និងកងព្រំដែនឡើងទៅ ត្រូវមានគណៈកម្មការជើងគោកមួយដើម្បីពិនិត្យវាយតម្លៃសំដៅធានាបានតម្លាភាព និងប្រសិទ្ធភាព។
លោកបញ្ជាក់ថា នេះគឺជាគោលការណ៍របស់កងទ័ពជើងគោកដើម្បីបញ្ជាក់ឲ្យនាយទាហាន ថ្នាក់ដឹកនាំនៅក្នុងអង្គភាពបានយល់ច្បាស់ ព្រោះការដំឡើងឋានៈ ការតែងតាំងមុខងារណាមួយមិនមែនជាការផ្ទេរសិទ្ធិអំណាចនោះទេ។ ប៉ុន្តែគឺជាការផ្ទេរការទទួលខុសត្រូវបន្តវេនពីមួយជំនាន់ទៅមួយជំនាន់ដើម្បីប្រសិទ្ធភាព និងនិរន្តរភាពនៃការបំពេញភារកិច្ចរបស់កងយោធពលខេមរភូមិន្ទ៕
