ប្ដីបាញ់ប្រពន្ធជាច្រើនគ្រាប់ ក្នុងហាងផឹកស៊ី បណ្តាលឱ្យរងរបួសធ្ងន់
សារព័ត៌មាន Cambodia News/
បុរសជាប្ដីបានដកកាំភ្លើងខ្លីម៉ាកK59 បាញ់លើប្រពន្ធជាច្រើនគ្រាប់ត្រូវត្រង់ចង្កេះ២គ្រាប់ ពោះ១គ្រាប់ ដៃស្តាំ១គ្រាប់លើដើមទ្រូងឆ្វេង១គ្រាប់ រងរបួសធ្ងន់ បានបញ្ជូនទៅសង្គ្រោះនៅមន្ទីរពេទ្យកាល់ម៉ែត ហេតុការណ៍បានកើតឡើងស្ថិតនៅតាមបណ្ដោយផ្លូវរថភ្លើង ចំណុចហាងទីរ៉ានី ក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ កាលពីយប់ថ្ងៃទី៧ ខែសីហាឆ្នាំ២០១៩។
ជនសង្ស័យជាប្តីមានឈ្មោះឆោម ចំណាន អាយុ៣៩ឆ្នាំ មុខរបរជាយោធានៅភូមិភាគ៥ ឋានៈពលបាលឯក។ស្រ្តីរងគ្រោះជាប្រពន្ធមានឈ្មោះជា គីមឡាងអាយុ២៩ឆ្នាំ រស់នៅជាមួយគ្នានៅភូមិ៧ ផ្ទះ៣៣៣ ផ្លូវបេតុង ក្នុងសង្កាត់ទឹកថ្លា។ប្តី
សាក្សីបានឱ្យដឹងថា មុនពេលកើតហេតុ បុរសជាប្ដីបានបើករថយន្តហាយឡេនឌ័រពាក់ផ្លាកលេខប.មានជ័យ.2A.6753 មកឈប់ចូលផឹកស៊ីក្នុងហាងមួយសន្ទុះ។ស្រាប់តែលេចមុខប្រពន្ធរបស់គាត់ជិះម៉ូតូកូនទាពាក់ផ្លាកលេខ1HJ8167មកឈប់រួចក៏ចូលទៅក្នុងហាងសំដៅទៅហៅប្ដី។
ប្រភពបានបន្តថា មិនដឹងជាមានរឿងអី ស្រាប់តែប្ដីកំពុងតែស្រវឹងស្រាផងនោះបានដកកាំភ្លើងបាញ់សំដៅទៅប្រពន្ធចំនួន៧គ្រាប់ បណ្ដាលឱ្យរងរបួសធ្ងន់ រួចក៏រត់ឡើងបើករថយន្តបើកតាមបណ្ដោយផ្លូវហាណូយក្នុងទិសដៅពីត្បូងទៅជើងយ៉ាងលឿន។
បច្ចុប្បន្នបុរសជាប្ដីត្រួវសមត្ថកិច្ចនាំខ្លួនមកអធិការដ្ឋាននគរបាលខណ្ឌសែនសុខដើម្បីសាកសួរនិងកសាងសំណុំរឿងបញ្ជូនខ្លួនទៅសាលាដំបូងចាត់ការបន្តតាមផ្លូវច្បាប់៕
