ក្រសួងអប់រំ ហាមដាច់ខាតមិនឲ្យប្រើម៉ាស៊ីនគិតលេខពេលប្រឡង
សារព័ត៌មាន Cambodia News/
ភ្នំពេញ (២៥ កក្កដា ២០១៩) ៖ ការប្រឡងសញ្ញាបត្រមធ្យមសិក្សាទុតិយភូមិ នឹងមកដល់នៅប្រមាណ៣សប្តាហ៍ទៀតប៉ុណ្ណោះ ហើយកាលពីពេលថ្មីៗនេះ ក្រសួងអប់រំ យុវជន និងកីឡា បានធ្វើការបកស្រាយអំពីមូលហេតុ ដែលក្រសួងហាមមិនឲ្យបេក្ខជនទាំងអស់ប្រើប្រាស់ម៉ាស៊ីនគិតលេខ អំឡុងពេលប្រឡង ដោយក្រសួងលើកឡើងថា ការមិនអនុញ្ញាតឲ្យប្រើម៉ាស៊ីនគិតលេខ គឺដើម្បីធានានូវសមភាព និងយុត្តិធម៌សម្រាប់បេក្ខជនទាំងអស់។
ការរៀបចំវិញ្ញាសានីមួយៗបានគិតគូរយ៉ាងល្អិតល្អន់ផ្អែកទៅតាមពេលវេលា ដែលបានកំណត់។ ម៉ាស៊ីនគិតលេខ មានច្រើនប្រភេទរាប់មិនអស់ មានមុខងារប្រើប្រាស់ តិច ឬច្រើនទៅតាមតម្លៃខ្ពស់ ឬទាប ដែលពុំមានសមធម៌ និងយុត្តិធម៌សម្រាប់បេក្ខជនទាំងអស់។ ការគិតលេខដោយខួរក្បាលនឹងបង្កើនភាពរួសរវើកធ្វើឲ្យមានការចងចាំបានល្អ។ ដូច្នេះបេក្ខជនទាំងអស់គ្នាហាមដាច់ខាតយកម៉ាស៊ីនគិតលេខចូលក្នុងបន្ទប់ប្រឡង៕
