អ្នកកើតជំងឺគ្រុនឈាមមានជាង១ម៉ឺននាក់ និងស្លាប់២៥នាក់ ក្នុងរយៈពេលជិត៣ខែ
សារព័ត៌មាន Cambodia News/
ភ្នំពេញ (១០ កក្កដា ២០១៩) ៖ យោងតាម សេចក្តីជូនព័ត៌មាន របស់ក្រសួងសុខាភិបាល នៅថ្ងៃទី១០ ខែកក្កដា ឆ្នាំ២០១៩ បានឲ្យដឹងថា ក្នុងរយៈពេលជិត៣ខែ ឆ្នាំ២០១៩នេះ ជំងឺគ្រុនឈាម បានផ្ទុះឡើង រាយប៉ាយដុំៗ តាមខេត្ត-ក្រុងបណ្ដាលឲ្យមានអ្នកកើតជំងឺ គ្រុនឈាម ជាង១ម៉ឺននាក់ និងស្លាប់២៥នាក់ ផងដែរ។
តាមសេចក្តីជូនព័ត៌មាន បានបញ្ជាក់ថា ជំងឺគ្រុនឈាម នៅប្រទេសកម្ពុជា បានចាប់ផ្ដើមកើនឡើង ពីដើមខែឧសភា រហូតដល់បច្ចុប្បន្ន ដោយរាយប៉ាយដុំៗ តាមភូមិសាស្ត្រនៃ រាជធានី-ខេត្តនីមួយៗ ដែលមានចំនួនករណី សរុប១៥០០០នាក់ និងស្លាប់២៥នាក់ គិតមកដល់ដើមខែកក្កដា ឆ្នាំ២០១៩នេះ”។
ក្រសួងសុខាភិបាល អំពាវនាវសារជាថ្មី ដល់ប្រជាពលរដ្ឋ និងអាជ្ញាធរគ្រប់លំដាប់ថ្នាក់ ត្រូវចូលរួមយ៉ាងសកម្ម អនុវត្តវិធានការការពារ ជំងឺគ្រុនឈាម តាមរយៈការអនុវត្តន៍វិធានការ រួមមាន ៖
១-អាណាព្យាបាល មាតាបិតា កុមារាកុមារី គ្រប់រូប ត្រូវកំចាត់ដង្កូវទឹក នៅតាមទីកន្លែងដែលមានទឹក ដូចជា ពាងអាងទឹក ថូផ្កា ចានទ្រជើងតុទូ ក្រឡ ធុង ខាប់ ជាដើម ដោយការផ្លាស់ប្តូរទឹក និងលាងសំអាត ជាប្រចាំឲ្យបានយ៉ាងតិចមួយដង ក្នុងមួយអាទិត្យ។
២- អាជីវករ និងម្ចាស់អាជីវកម្មទាំងឡាយ ដែលប្រកបរបរពាក់ព័ន្ធ នឹងសំបកកង់ ពិសេសសំបកកង់ឡាន និងសំបកកង់ម៉ូតូទាំងអស់ សូមធ្វើការគ្រប់គ្រង សំបកកង់ទាំងនោះ មានសុវត្ថិភាពជៀសផុត ពីការដក់ទឹក។
៣-ត្រូវសំអាតការដ្ឋាន សំណង់ កុំឲ្យមានកន្លែងទឹកជូត ជាជម្រកមូសខ្លា និងរក្សាអនាម័យល្អជានិច្ច។
៤- ករណីមានរោគសញ្ញា ក្តៅខ្លួនខ្លាំងភ្លាមៗ ត្រូវប្រញ៉ាប់នាំអ្នកជំងឺ ទៅរកសេវាថែទាំ សុខភាពរដ្ឋ៕
